Guarda nos Costa (GnC) a logra facilita un otro vuelo humanitario pa Venezuela. Awe merdia a sali e di 10 vuelo humanitario for di Aruba pa Venezuela.
Richard Kramers, Director di Guarda nos Costa a confirma cu 87 Venezolano cu tabata deteni of tabatin meldplicht na Guarda nos Costa a sali riba e vuelo ey. Entre nan tin cu djis a keda Aruba ilegalmente mas largo di locual ta permiti pa ley y tabatin algun cu a expulsa, despues di a sinta castigo pa un crimen cometi riba nos isla. E demas stoelnan den e avion a bay cu 43 Venezolanonan cu boluntariamente kier a regresa nan pais natal bek.
E vuelo aki lo no tabata posibel sin cooperacion di Ministerio di Husticia di Aruba, Consul general di Venezuela na Aruba, Departamento di Aviacion Civil, DIMAS, Departamento di Relacionnan Exterior, IASA, Cuerpo Policial Aruba, Departamento di Finansas y Guarda nos Costa. No por keda sin resalta e bon cooperacion ricibi di LabHOH cu a facilita e testnan di Covid pa tur cu mester a subi e avion pa regresa cas.