Home Politics Ursell Arends: ” Nos no ta forma parti di ningun complot’ ‘Raiz...

Ursell Arends: ” Nos no ta forma parti di ningun complot’ ‘Raiz for di inicio ta para pa integridad’

SHARE

Lider di partido RAIZ, diamars mainta a bishita Gobernador di Aruba, despues di su bishita a papia cu miembronan di prensa cu tabata warde pa fo dilanti oficina di Gobernador.

Sr. Ursell Arends a gradici su 5474 votadornan cu a haci RAIZ e di tres partido mas grandi na Aruba.

RAIZ kier eherce cambionan grandi den gobierno. Su persona a sigui bisa cu nan a traha un team fuerte den e ultimo 4 añanan y nan ta cla pa asumi nan responsabilidad.

RAIZ, diferente na MAS y ACCION21, ta para pa integridad, esaki ta algo cu nan a bin cu ne for di inicio di e partido.

E lider di e partido a sigui bisa, ‘cu e fundeshi di integridad pa nan ta democracia’. Raiz na varios ocasion a respeta e diferente institutonan importante di nos pais, manera Raad van Advies, Algemene Rekenkamer y nos Gobernador.

E la sigui bisa cu Raiz ta respeta Electorale Raad, democracia y sigur e resultado di elecion.

Raiz ta e di tres partido mas grandi y nan lo asumi nan responsabilidad sea ta duna contenido na e gobierno nobo of den parlamento. Segun e lider a sigui bisa, cu e pueblo a pidi pa tin un coalicion atrobe y cu nan lo respeta desicion di e pueblo votador.

Tambe e la splica cu fin di siman e la tuma dos dia pa su famia, pa motibo cu nan ta di luto, su suegra cu ta biba cu nan den cas a fayece.

E la scucha durante fin di siman varios rumornan, noticianan cu ta coriendo rond, pero enfaticamente Sr. Arends a bisa cu Raiz no ta forma parti di ningun complot y lo escoge pa duna espacio na e proceso formal. Su persona for di comienso a avisa e partidonan cu Raiz no ta participa na ningun complot. Raiz lo duna espacio pa e proceso canalisa.

Raiz ta dispuesto pa scucha di tur partido y asina mira si nan ta bay forma parti di e coalicion of ta escoge pa bay parlamento.

Pa RAIZ, integridad no ta negociabel y lo sigui duna esaki contenido tambe, via Integriteitskamer, Bureau Integriteit y Corporate Governance  Quote. RAIZ lo para pa integridad riba un nivel mas halto, riba nivel di e ministernan.

E prome partido yama pa forma un gobierno ta e partido mas grandi, y esey no logra lo bay pa e partido di dos mas grandi y si esaki no logra lo yama partido Raiz aden pa ta e siguiente partido cu lo mester trata na forma un gobierno nobo.

Segun Arends, nan lo por tuma un desicion pa forma un coalicion a base di un acuerdo di gobernacion y no via di emocion of percepcion. Unicamente a base di un contenido cu nan lo ta di acuerdo cu ne. Si yega asina leu mester por negosha e puntonan di gobernacion cu Raiz ta para pe.  E partido tin e personanan capacita pa ta den parlamento y pa ta un minister.

Sr. Ursell Arends a pone bon cla cu RAIZ no a reuni cu niun partido ainda, ni prome cu elecion y ni despues di elecion. Nan no lo cera porta pa niun partido politico pa forma un gobierno, pero tur cos ta depende e rol di integridad den e acuerdo di gobernacion.