Home Corte Grupo cu a haci cantidad di asalto arma condena entre 14 y...

Grupo cu a haci cantidad di asalto arma condena entre 14 y 4 aña di prison

SHARE

ORANJESTAD – Na comienso di luna, 10 hende di cual 1 dama, a presenta den Corte pa e caso penal cu Ministerio Publico a cuminsa contra nan.

ARUBANATIVE por a compronde cu e mayoria ta Venezolano, kendenan a haci un serie di asalto arma cu violencia na cas di famia. Hendenan a wordo amenaza cu arma na cabez, maltrata y mara. Recien den oranan di merdia, Hues a baha pisa riba e grupo aki.

Durante tratamento di e caso, Fiscal a bisa Hues cu e grupo aki a haci 7 asalto arma cu violencia den un periodo di 3 luna. Ta asina cu no ta tur a participa na tur e asaltonan y pesey Fiscal a haci acusacion contra cada un separa pa mustra kico tur cada un a haci.

Fiscal a mustra cu e grupo aki tabata drenta cas di famia, menaza hende cu arma caminda tabata pone e arma na cabez di hende, dal y skop hende. Tabatin caso caminda mucha chikito a mira con e asaltantenan aki tabata bati nan mayornan.

Fiscal a condena e hecho cu e famianan a pasa tur e trauma aki den nan propio cas. Nan cas caminda nan mester sinti nan mes sigur. El a mustra cu hasta muchanan den cas, e asaltantenan a pone paña rond di nan cabez. Fiscal ta haya cu esaki ta un violacion di privacidad di hende.

CASTIGO EXIGI

Fiscal a bisa cu mester manda un señal bon cla cu no ta tolera esaki. E castigonan cu Fiscal a exigi tabata: 16 aña di prison pa e hombernan M.A.G.A., A.J.D.B., J.L.P.B. y J.C.V.V. Fiscal a exigi 15 aña di prison pa e homber D.J.R., 12 aña di prison pa e dama C.A.W., 10 aña di prison pa e homber C.J.V.V., 6 aña pa e hombernan W.S.N.V. y F.J.B.R., 5 aña di prison pa F.R.M.S.

Hues den su sentencia a condena total e serie di asaltonan arma cu a sosode. Sinembargo tin algun di e casonan caminda Hues no ta haya cu algun di e sospechosonan ta culpable y a declara nan liber pa e caso pero culpable pa otro.

HUES A DUNA CASTIGO

Hues a condena e homber J.L.P.B. na 14 aña di prison. E tres hombernan M.A.G.A., J.C.V.V. y D.J.R. a wordo condena na 10 aña di prison. E Homber C.J.V.V., kende ta ruman di J.C.V.V., a wordo condena na 8 aña di prison. E dama C.A.W. a wordo condena na 5 aña di prison. E tres hombernan W.S.N.W., F.J.B.R. y F.R.M.S. a wordo condena na 4 aña di prison.