Home Corte Fiscal a cuminsa caso penal contra dos agente di Recherche

Fiscal a cuminsa caso penal contra dos agente di Recherche

SHARE

ORANJESTAD – Awe mainta e dos agente di Recherche, E.de Mey. y G. Dammers a presenta den Corte pa e caso penal cu Ministerio Publico a cuminsa contra nan. Aruba Native por a compronde cu un Fiscal a bin for di Curacao special pa trata e caso y el a rabia cu na ultimo ora, 1 dia promer cu e caso, e abogadonan mr. Lejuez y mr. Illes a haci peticion pa mas investigacion.

E acusacionnan cu tin contra e dos agentenan ta:

– ladronicia di un cellular entre 1 April 2018 y 1 November 2018.

– Nan ta wordo acusa di pasa informacion confidencial di Polis via    whatsapp na un persona entre 12 Augustus 2018 y 1 November    2018.

– Tambe ta acusa nan di a tuma servicio of regalo for di e               persona aki entre 1 April 2018 y 1 November 2018.

– Tambe nan ta wordo acusa di a haci mal uso di nan autoridad como Polis door di tuma informacion di un ciudadano criminal sin autorizacion of permiso entre 1 April 2018 y 1 November 2018.

Hues a splica cu e intension awe mainta tabata pa trata e caso pero na ultimo ora a bin peticion di abogadonan cu kier mas investigacion. Hues a bisa cu e hecho cu e abogadonan tin deseo pa haci investigacion, lo considera un “regie zitting” apesar cu Ministerio Publico ta reclama cu esey no por mas pasobra e partidonan a bay di acuerdo pa trata e caso. Hues a splica cu el a hala atencion di Ministerio Publico pa e caso aki pasobra promer e no a ricibi ningun documento di e caso, solamente e dos nombernan. Despues di insistencia, Hues kende tabata cla pa kita e caso for di schedule, a haya e documentonan di e caso.

RECLAMO DI FISCAL

Fiscal a bisa Hues a bisa cu enberdad Hues no ta perde e autordad pa determina un regie zitting. Sinembargo el a reclama e hecho cu un dia promer cu e caso, e ta haya peticion di abogadonan pa mas investigacion. E Fiscal a mustra cu el a prepara e caso pa trata ayera mainta, manera tabata planea. Fiscal a splica cu for di Februari 2021 a puntra e abogadonan si tin deseo pa mas investigacion. Na Maart 2021, el a tende di e abogado cu nan no kier mas investigacion. Despues cu tabata planea cu lo bay trata e caso, un dia promer ta haya sa cu abogadonan kier mas investigacion. Fiscal ta haya esaki ta contra e stipulacion den e proceso. E proceso stipula segun ley ta cu 3 dia promer mester haci peticion.

PIDI PA HACI MAS INVESTIGACION

Abogado mr. Lejuez di d M. a bisa Hues cu durante combersacion cu su cliente, a compronde cu d.M., despues di a check su documentonan a haya un map di anotacion cu ta importante pa e caso. Despues di a evalua e anotacionnan, e abogado ta haya cu mester haci mas investigacion. Ta anotacionnan cu d M. a haci na April 2018 ora el a papia cu e dama T., kende tabata sospechoso den un investigacion.

E abogado a pidi pa investiga si e cellular cu d M. tabatin, tabata confisca pasobra ta acusa d.M. di a malversa e cellular. E abogado a bisa Hues cu na November 2018, d M. a duna e cellular na comisario di Polis den presencia di un otro agente ora cu a dun’e prohibicion pa drenta oficina. E abogado a señala cu despues a haci investigacion riba e cellular cu autorizacion siendo cu promer no a duna autorizacion. Segun mr. Lejuez, tin dos Fiscal cu a bisa cu mester detene e dama T. pero ningun momento a duna orden di detencion. E kier claridad riba esaki pasobra su cliente ta wordo acusa di lo a haci palabranan cu e dama T.

Abogado mr. Illes a splica cu durante cu tabata studia e caso hunto cu su cliente D., a haya cu mester di mas investigacion. Papia di un dama T. cu lo a papia cun’e siendo cu e ta un sospechoso. Ta papia di un cellular cu lo a wordo malversa. E abogado kier mas investigacion.

Tanto mr. Lejuez como mr. Illes a pidi pa scucha como testigo diferente agente.

Fiscal a reacciona cu esaki ta contra e proceso normal di Corte. El a bisa Hues cu e ta haya straño cu abogadonan ta bin cu e peticionnan asina laat. Fiscal su promer reaccion ta cu Hues mester rechaza tur e peticionnan.

Riba e peticion pa scucha dos Fiscal, el a pidi Hues pa rechaza esaki pasobra no tin relevancia. Si a acaso Hues kier tog, Fiscal ta propone pa laga e dos Fiscalnan traha un procesverbaal.

Riba e buki di anotacion di d M., Fiscal ta haya relevante pa traduci di Papiamento na Hulandes e partinan cu ta importante. El a mustra cu e buki di anotacion ta propiedad di Cuerpo di Polis pasobra d M. como agente di Recherche a haci anotacionnan na oficina. E ta haya cu d M. a actua ilegal door di coy e buki di anotacion for di lachi di oficina.

Fiscal a bisa cu di e 6 personanan cu ta pidi pa scucha como testigo, e ta haya 4 ta relevante. Ta trata aki di agentenan di Recherche. Hues a bisa cu lo bay studia e opinionnan y dialuna lo duna su decision.