Pueblo paga tino. Awor na vispera di eleccion tin un politico cu kier pretende cu den e Parlamento actual nos no ta of no por haci nos trabou manera mester ta. Pregunta ta: El a lubida cu pa 7 aña largo el a sostene e Gobierno di AVP, Mike Eman, como parlamentario? Un gobierno cu ya tin un ex-minister condena pa negoshi cu onheffing, otro ex-minister cu actualmente ta keda sospecha di soborno, abuso di poder, labamento di placa y participacion na un organisacion criminal, otro ex-minister cu ta keda menciona den e rapport forensico di RDA y otro cu a haya placa di baho mundo pa campaña 2017.
Mirando e facilidad cu e ta acusa tur hende di ta sostene corupcion y di no ta integro, den e caso aki nos lo por bisa mescos di dje? Esta cu e la sostene pa 7 aña largo corupcion y falta di bon gobernacion y a faya den su tarea di controla su gobierno e tempo ey. E tipo di parlamentario aki nos kier? Pueblo mester bisa no! Pasobra no ta sin mas por acepta cu e ta saca e conclusionnan “facil” cu e ta haci na su convinencia, pintando tur hende preto y halsando su mes como e unico cu ta para pa bon gobernacion y ta contra corupcion. Realidad ta cu te dia di awe nos no conoce e spiritonan cu el a encontra y tampoco sa kico el a haci cu nan. Tampoco nos ta compronde dicon a tume 6 luna pa saca e spiritonan cu el a encontra den ministerio di e ex lider di su partido e tempo ey. El a bira minister fin di januari 2020 y ta te cu dia 31 di juli 2020 e la cuminsa “informa” parlamento di esakinan. Puro casualidad cu el a haya gana di haci esaki net ora su partido kier a core cu ne y no prome.
Adicionalmente e sa bon bon con cos ta funciona y sigur e sa cu como Parlamentario hopi biaha nos no ta of por haya tur documento y rapportnan. Asta den pasado Gobierno di AVP sin mas ta nenga di duna esakinan of ta ponenan accesibel bou condicionnan ridiculo manera tabata e caso di e contracto cu Citgo. Hopi biaha nos ta haya documento, carta, rapportnan ter inzage durante un reunion caminda e tempo no ta suficiente y e condicionnan no ta optimal pa nos por repasanan manera mester ta.
Tanten no tin keho ta keda haci door di ciudadanonan of instancianan, nos como Parlamentario no por sa kico ta pasa den departamentonan di Gobierno mucho menos den Ministerionan. Un cos si mi por bisa di Fraccion di MEP, miembronan di nos Fraccion a entrega na mas cu un ocasion keho(nan) substancia na Ministerio Publico asina cu a keda poni na altura di esakinan. Banda di esaki Fraccion di MEP a pone como prioridad pa percura pa Aruba tin un gobierno integro y transparente na tur momento. Nos Fraccion di MEP a cumpli cu e obhetivo pa crea mas transparencia den gobernacion, y a traha pa crea e condicionan necesario pa preveni corupcion. Nos tabata y ta consciente cu e maneho publico mester ta transparente y etico. Nos a duna contenido na e puntonan aki door di:
- aproba un ley di destaho publico nobo;
- aproba introduccion di Bureau di Integridad;
- presenta y aproba ley di financiamento di partidonan politico cu mester evita cu placa di baho mundo ta wordo uza pa hiba campaña electoral;
- a presenta y aproba e ley di Ombudsman, pa asina tin un defensor di pueblo pa garantisa proteccion riba tur nivel;
- a presenta ley di screening cu mester garantiza integridad pero esaki lastimamnete no a keda aproba den sala di Parlamento.
Hopi a keda haci pero ainda nos no ta cla. Pesey mes diabierna awor 25 di juni 2021 vota consciente y enberdad no scucha solamente e palabranan bunita pero wak ken enberdad ya caba a duna contenido na esakinan. Hunto cu bo nos ta sigui avanza, trahando hunto nos ta logra mas.