Sabana Grandi: Diasabra den oranan di marduga, presencia di polis a wordo pidi na un cas na Sabana Grandi pa motibo cu un auto a dal contra un cura di cas y kibra un parti di e cura. E habitantenan cu a wordo spierta pa e zonido duro di e impacto mesora a yama polis.
Prome cu polis a yega na e sitio, e dama chauffeur a sali for di e auto y cuminsa cana bay direccion pabou.
Na yegada di polis, na e sitio, enberdad nan a bin topa cu un MG preto bandona para banda di caminda, e auto tabata tin basta daño material na e parti di dilanti. Tambe e cura di e cas cu ta keda panort di caminda tabata tin basta daño material, un parti di e cura a wordo kibra y benta abou.
Mientras cu e patruya tabata atendiendo cu esaki, un van blanco a yega na e sitio y e dama cu tabata manehando e MG cu accidenta, a baha for di e van y a cerca polis. E dama chauffeur e tabata hopi spanta y tabata pia abou.
Segun e dama chauffeur, despues di hopi tempo el a dicidi di bay sali dal un trip. Net na momento cu polis tabata atendiendo cu e dama, su mayornan tambe a presenta na e sitio. Manera e dama a mira su mayornan, e la cuminsa trata nan malo y te hasta ponenan bay sinta den auto, pasobra segun e dama su mayornan lo ta instig’e.
