ORANJESTAD – Awe mainta via video conference, Hues a dicta sentencia den e caso penal cu Ministerio Publico a cuminsa contra e homber J.E.D.
Aruba Native por a compronde cu Hues no a sigui exigencia di Fiscal cu ta 7 aña di prison. Hues a dicidi cu mester yuda J.E.D. manera e raportnan di Psychiater, Psycologo y Reclasering ta mustra. Hues a condena J.E.D. na 4 aña di prison di cual 6 luna ta condicional cu e condicion special cu e mester sigui tratamento.
CULPABEL DI TIRA
Hues a bisa cu J.E.D. ta blo desmenti cu e no tabata den e cas di G. y tampoco a tira. Hues a mustra riba declaracion di e victima G., kende a bisa cu e mainta ey su amigo J.E.D. a bin bishit’e. El a bisa J.E.D. cu el a pidi e dama M. tambe pa bin pa asina nan chil. Na dado momento J.E.D. drenta G. su camber y reclama G. di lo a horta un tas. Promer cu G. por a bisa algo, J.E.D. a saca arma y tir’e na bariga. E bala drenta na custiya di G. y sali na lomba. A haya e bala den e matras. A resulta cu e bala ta di un revolver Caliber 38. G. a bisa cu ta J.E.D. a tir’e. El a yama e dama M. pa yud’e. M. a bay na e cas y haya J.E.D. ta sangra riba su cama. El a bisa cu el a haya un app di G. si e kier bin chil cu J.E.D. E mama di G. tabata na cas y a bisa cu mas o menos 10’or un amigo di su yiu a bin cas y 12’or ora el a sali ainda e homber tabata tey. El a reconoce J.E.D. riba potret como esun cu tabata na e cas. Hues a bisa cu e no ta kere J.E.D. cu e no tabata na e cas. Tin tres dos testigo y e victima cu ta bisa cu J.E.D. tabata na e cas.
Hues a bisa cu e ta haya legalmente proba cu J.E.D. a tira G. Hues no ta haya proba cu J.E.D. a horta un cadena di oro di G. Tambe Hues ta haya proba cu J.E.D. tabatin un revolver Caliber 38. El a bisa cu e tiramento ta un hecho castigabel hopi serio.
CASTIGO
Pa cu e castigo, Hues a mustra cu tin hopi raportnan di J.E.D. Hues a mustra cu den pasado pa un caso penal tabatin orden di Hues pa tratamento obligatorio, pero nunca esaki a tuma lugar. Hues a bisa cu e ta comparti punto di bista di abogado cu ta di lamenta cu esaki no a sosode. Ta un hecho cu J.E.D. mester ayudo. Raportnan di Reclasering, Psychiater y Psycologo ta mustra esey.
Hues a bisa cu pa intento di mata cu arma di candela, tin castigo entre 7 y 9 aña di prison. Hues a splica cu el a studia e raportnan y a scucha bon loke abogado a bisa. Hues ta comparti abogado su opinion cu J.E.D. mester di ayudo. Pesey el a dicidi di duna menos castigo pa asina haci posibel cu J.E.D. por haya ayudo.
Hues a splica cu segun ley, por duna ayudo si no surpasa 4 aña di prison. El a condena J.E.D. na 4 aña di prison, di cual 6 luna ta condicional cu 3 aña di prueba.
Hues a bisa cu den e periodo di prueba e ta pone e condicional special cu J.E.D. ta cay bou guia di Reclasering y cu J.E.D. mester sigui indicacion di Reclasering. Hasta cu esaki ta encera tratamento psychiatrico na Respaldo, sigui curso di regula agresion. Tambe si Reclasering haya cu J.E.D. mester haya tratamento den un institucion sera.