ORANJESTAD, Aruba – 15 di juni, 2021: E intencion tabata pa e crucero regresa nos isla te otro siman bek, pero…e recepcion, e protocolnan di salud y e calor di nos Arubianonan a haci cu Celebrity Cruises a dicidi e siman aki cu ta adapta e iterinario di Celebrity Millennium y ta regresa e siman aki mes atrobe. E crucero ta sali for di Sint Maarten, ta pasa Barbados, Curacao y Aruba, pa despues regresa Sint Maarten atrobe. Ta obvio cu Aruba ta sigui halto riba e lista di wafnan mas gusta y preferi pa pasaheronan riba cruceronan. E atencion special aki y peticion pa un “call” adicional ta demostra e confiansa den nos isla.
Diahuebs awor, 17 juni, nos lo yama Celebrity Millennium bonbini un biaha mas den nos waf. Pa awor, Celebrity lo sigui bishita Aruba regularmente te cu Augustus. A adapta tur nan protocolnan di salud hunto cu e instancianan di salud di Merca y tur e islanan unda nan ta bishita riban nan iterinarionan.
Pa awo e cruceronan lo start den fase y cu capacidad reduci pa garantisa espacio natural. A introduci mas tecnologia moderno pa adapta nan proceduranan ora di check in y ora di bandona e crucero.
“Sigur cu esaki ta un desaroyo sumamente positivo pa nos isla, unda cu nos ta wak e parti aki di nos economia tambe recuperando. Aruba ta keda un destinacion preferi pa e turistanan crucero y esaki ta keda demostra un biaha mas.” asina Marc Figaroa, director di Aruba Ports Authority a duna di conoce.
E turistanan ta gosa masha hopi mes aki y sigur nos lo kier pa nan regresa bek. Tin di nan hasta a considera Aruba como e miho destinacion den henter e trip. “Pesey ta importante pa Aruba sigui cuida y sigui baha e casonan activo di Covid. Menos caso activo nos tin, miho prepara nos ta den protocolnan di salud, mas e pasaheronan lo sigui vota pa Aruba ta riba iterinario di e cruceronan como un destinacion perferi den caribe”, segun Marc Figaroa a expresa.
Tocante Celebrity Cruises:
Celebrity Cruises ta maneha un flota di 14 crucero cu ta ofrece pasaheronan un experiencia unico bishitando diferente destinacionnan. Celebrity ta conoci pa ta prome cu varios logro den e industria di crucero na mundo, manera por ehempel, nan ta e prome pa uza solar panel riba un crucero; e prome pa elimina botr’i awa di plastic abordo; e prome pa tin un capitan femenino di Merca na cabes y e prome pa tabatin un matrimonio legal di mesun sexo abordo di nan crucero. Celebrity Cruises ta nabega pa tur shete continente, bishitando mas di 300 destinacion den 70 pais. Celebrity Cruises ta un di e cinco marcanan renombra mundialmente cu ta pertenece na e compania Royal Caribbean Group.
Tocante Aruba Ports Authority:
A funda Aruba Ports Authority N.V. desde aña 1981, pues ta celebra 40 aña di existencia e aña aki. E compania ta pertenece 100% di Gobierno di Aruba y tin 80 trahado den servicio directo. Hunto nan ta maneha e dos wafnan di Aruba, pues tanto esun di crucero na Oranjestad como tambe esun di carga na Barcadera, unda nan tin un acuerdo di operacion cu ASTEC. Pa aña ta yega mas o menos 300 crucero na Oranjestad y un otro 950 barco di carga na Barcadera. E compania ta stabiel y ta bou maneho di Marc Figaroa.