Home Politics Alan Howell cu peticion pa coleganan parlamentario Por fabor stop di...

Alan Howell cu peticion pa coleganan parlamentario Por fabor stop di campaña un rato y ban atende urgentemente e situacion critico di criminalidad

SHARE

Alan Howell a pidi atencion na tur parlamentario pa por fabor stop campaña pa un rato y  duna atencion na un situacion hopi urgente, cual ta e aumento di criminalidad  pariba di brug.

“Atencion, atencion na tur parlamentario ban stop di campaña un rato y bisti bo bachi bek un rato. Diabierna mi a haci un peticion na Presidente di Parlamento pa un reunion publico cu caracter di urgencia”, Howell a expresa. E ta indica cu e criminalidad (tiramento) cu ta azotando pariba di brug (San Nicolas) cual varios a bira casonan fatal, no ta aceptabel pa e pueblo mas. El a pidi Minister di Husticia pa ta presente den reunion publico pa duna cuenta. Den e peticion haci na Presidente di Parlamento, Alan Howell ta specifica cu den e prome seis lunanan di 2021 por a constata un cantidad alarmante di tiroteo den e area pariba di brug, unda lamentablemente diferente persona a perde nan bida. Den cuadro di esaki e ta pidi pa e mandatario encarga cu Husticia, Seguridad y Integracion pa duna un splicacion di e situacion y e pasonan corectivo y preventivo cu a of lo mester wordo tuma pa evita cu e crimennan cruel aki bolbe tuma luga.

Finalisando, Alan Howell a bisa “mi lo bin cu un mocion pa duna pueblo un chens pa entrega nan arma sin mester haya castigo. Un danki na e parlamentarionan di e otro partido pa sostene mi peticion pa por pidi e reunion publico aki cu caracter di urgencia.