Home » Fiscal a exigi 2 aña di prison pa homber cu lo a maltrata y viola su señora

Fiscal a exigi 2 aña di prison pa homber cu lo a maltrata y viola su señora

by Admin
0 comment 68 views

ORANJESTAD – Awe mainta e homber Arubiano W., a presenta den Corte di Husticia pa e caso penal cu Ministerio Publico a cuminsa contra dje.

Aruba Native por a compronde cu aunke cu W. ta para riba cu e no a viola su señora, Fiscal ta hay’e culpable y a exigi 3 aña di prison di cual 1 aña ta condicional.

E acusacionnan cu Fiscal a presenta den Corte contra W. ta cu dia 25 October 2020, el a viola y maltrata su señora. Tambe Fiscal ta acusa W. cu dia 17 November 2019, W. a maltrata su señora door di gar’e na garganta y dal’e den cara. E victima B. a presenta den Corte cu abogado mr. Fraser.

Relaciona cu e acusacion di 17 November 2019, W. a bisa Hues cu el a mira B. cu un otro hende. El a bisa B. cu awor e tin un otro hende y a cana bay. Hues a bisa cu segun raport di Polis, 9.20 di mainta B. a presenta na warda di Polis pa haci denuncia. El a bisa cu na parada di bus, W. a gar’e na su garganta y dal’e na cara. Polis a constata cu B. tabatin un banda di cara hinca y garganta cora. E tabata yora y a bisa cu e tabatin dolor.

Pa loke ta e caso di violacion riba 25 October 2020, W. a bisa cu e dia ey tabatin celebracion di hacimento di aña di un yiu di B. Ora cu tur hende a bay, a surgi un discusion entre W. y B. W. a bisa Hues cu e relacion no tabata bon y el a bisa B. cu e tin 9 dia pa nan separa. B. lo a laga sa cu ningun hende por sak’e for di e cas. Den patio pafor nan a cuminsa pleita. Despues den camber, segun W. el a bay pa drumi, e klechi a slip y el a dal su cabez duro contra muraya. El a dal B. un wanta den cara. Un rato despues Polis a yega. El a bisa Hues cu no tabatin relacion sexual. El a desmenti di a viola y menaza B.

Hues a bisa cu segun raport Polis, 25 October 2020 un mucha a yama bisa cu su padastro ta maltratando su mama. Nan bay Turibana y mira B. cu su cara hopi hincha, su casi wowo robez blauw, boca cu herida y hincha. B. a bisa cu el a wordo maltrata door di su casa kende ta kere cu B. no ta fiel. W. lo a controla B. su cellular y ora el a mira potret for di tempo cu nan no tabata pareha, a dal B. E yiu di B. a bisa cu el a mira W. dal su mama cu e mama su cellular.

B. a declara na Polis cu den camber, W. a maltrat’e y a viol’e masha bruto. Segun B., no ta promer biaha cu esaki ta sosode. E tabata yora y a bisa cu e tin hopi dolor.

Abogado mr. Fraser a haci demanda di daño contra W. El a bisa cu B. ta ilegal na Aruba y no tin AZV. E demanda di daño ta e gastonan di ambulance, Promer Auxilio na hospital y cu B. mester a bay biba otro caminda.

Fiscal a bisa Hues cu e ta haya legalmente proba cu na 2019, W. a maltrata su señora B. na un parada di bus. Tambe Fiscal ta haya legalmente proba cu W. a maltrata y viola su señora B. na forma brutal. Fiscal pa cu e castigo, a bisa Hues cu e ta kere den castigo combina pa asina forza W. haci tratamento. El a exigi 3 aña di prison di cual 1 aña ta condicional cu 2 aña di prueba caminda mester sigui instruccionnan di Reclasering.

Pa loke ta e demanda di daño, Fiscal ta haya cu no por inclui pagamento di huur. Si e ta haya cu W. mester paga e tratamento. Esey ta sali algo mas cu 1200 florin.

Hues, despues di a scucha abogado di W., a sera tratamento di e caso y a bisa cu dia 2 Juli 2021 e lo dicta sentencia.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio