Home Local ‘E DEBATE’ CU ENFOKE RIBA ‘LIDERNAN Y MILLENIALS’ TA DIARANSON 9 DI...

‘E DEBATE’ CU ENFOKE RIBA ‘LIDERNAN Y MILLENIALS’ TA DIARANSON 9 DI JUNI PA 7 OR DI ANOCHI

SHARE

Bou di iniciativa di un ‘grupo di enfoke’ di hobenan local den combinacion cu e team di produccion di e programa ‘Vota pa Ken’ y e team di ‘Xclusivo Magazine’ lo organisa ‘E DEBATE’. “E DEBATE” aki lo tuma lugar diaranson dia 9 di Juni pa 7 or di anochi na Renaissance Convention Center.

E DEBATE lo ta “Hybrid” unda cu lo tin un publico limita presente den sala y pueblo completo lo por sigi esaki via rednan social manera e.o e pagina di facebook di ‘Vota Pa Ken’, ‘Debate Virtual Xclusivo’ y tambe otro medianan local cu lo join e transmission for di 7 or di anochi. Algun di e topiconan cu lo enfoca riba dje ta salubridad, educacion, problemanan social y husticia.

Un total di 10 partido a confirma nan participacion na e debate aki. Loke ta unico ta cu no ta solamente e lider di partido lo debate, pero tambe un representante ‘Millenial’. Esnan cu a confirma nan presencia ta ACCION 21 (Miguel Mansur y Christian Soto Garcia) , AVP (Mike Eman y Gerlien Croes), CURPA (Eric Ras y Ashan Tromp),HTC (Gilbert Webb y Michelangelo Celestijn) , MEP (Evelyn Wever Croes y Rocco Tjon),. POR (Alan Howell y Patrick Kock), PPA (Lisette Malmberg y Joseandro Chiquito),RAIZ (Ursell Arends y Misha Raymond), RED (Ricardo Croes y Kinsasha Van Der Bliek) y UPP (Seraida Pemberton-Leonard y Yahaira Kuiperi).

E moderadornan pa e anochi aki lo ta den man di un team hopi balansa. Ta trata aki di e presentadornan di e programa Vota Pa Ken, tres hoben esta Samil Susebeek, Mauro Caralps y Sharkk Gario cu lo modera e parti cu e representantenan millennial y Jaqueline Wernet hunto cu Atan Lee JR presentadornan di e programa Debate Virtual Xclusivo lo modera e parti unda cu e lidernan di partido lo debate.

E ekipo organisador cu ta consisti di diferente ‘young entrepreneurs’ den diferente ramo nan a formula e preguntanan y ponencianan basa riba entre otro decision di corte, rapportnan e.o di SER, Crisisplan, Landspakket, Plan di Educacion Nacional y precupacionnan di nos comunidad vocifera tanto den medianan local como social cu lo percura pa un debate riba nivel y contenido. Tambe mester menciona cu e grupo di organisador a organisa un debate similar cu hopi exito durante e eleccion anterior. Esaki a tuma lugar den Cas di Cultura.
Pa locual ta produccion, esaki lo ta den man di Elite Productions & Entertainment y Elite Studios.

Pa e publico den sala ta hopi importante pa mantenan nan mes na e reglanan principal di e.o pa no bini cu material di campaña, material di hasi desordo etc. Tanto e publico como e candidato mester mantene respet pa otro.

Danki na Setar N.V., Subway, Crest, Elite Productions & Entertainment pa nan aporte pa hasi e debate aki posibel.

Unda por mira E DEBATE:

https://www.facebook.com/votapaken y https://www.facebook.com/xclusivomagazine