Den cuadro di e proyecto ‘Voedselhulp’, Fundacion Pa Nos Comunidad (FPNC) ta informa e clientenan activo di Rode Kruis cu ta ricibi un E-voucher te cu 30 di juni 2021 riba e posibilidad pa registra na FPNC y asina lo por continua na ricibi e sosten di alimento den forma di pakete di cuminda na FPNC.
FPNC ta anuncia na comunidad di Aruba cu entrante 1 di juli te cu 31 di december 2021 su tarea den ayudo di cuminda na e famianan financieramente vulnerabel registra na Rode Kruis por continua pa medio di e proyecto di Noodvoedselhulp.
Manera ya a ser anuncia den medionan di comunicacion cu Pais Aruba lo tuma over e ‘Voedselhulpprogramma’ di Rode Kruis conforme palabracion entre gobierno di Aruba y Hulanda como parti integral di e maneho vigente di e crisis di Covid-19. Bureau Rampenbestrijding Aruba (BRA) ta encarga pa lidera e proyecto aki. Como e unico banco oficial di cuminda, den su tarea principal di combati pobresa ya desde 2009 y pa e trabao desplega durante e pandemia, Fundacion Pa Nos Comunidad a wordo aserca pa ta encarga cu e parti di ehecucion di e proyecto aki y distribucion di e paketenan di cuminda. E meta di e proyecto aki ta pa coordina nacionalmente e ayudo di cuminda na especialmente clientenan activo di Rode Kruis cu a ser afecta door di e crisis di COVID-19.
Registracion digital pa e clientenan activo di Rode Kruis
- Entrante dialuna 7 di juni 2021 te cu diadomingo 13 di juni 2021 lo por registra via e website di FPNC www.fpnc.aw. Lo tin un link disponibel di e formulario di registracion.
- Rode Kruis lo manda tur cliente activo un code individual cu e persona cu aplica mester yena den e formulario di registracion di FPNC.
- Ta hopi importante pa esnan cu aplica suministra mas informacion posibel pa asina tin un evaluacion adecua di cada peticion.
Proceso di registracion y aprobacion
Tur registracion lo pasa den un proceso di screening cu lo dura 2 pa 3 siman. E screening ta basa riba verificacion di datonan suministra door di cliente, evaluacion di grado di necesidad di ayudo, control di dobel aplicacion den e sistema di datos general di FPNC y verificacion di informacion general/adicional.
Despues di e proceso di screening, verificacion y aprobacion FPNC lo informa tur aplicante desde e prome siman di juli si nan peticion pa yudansa a wordo aproba of rechasa. Den caso di aprobacion e persona lo mester entrega su E-voucher di Rode Kruis na FPNC y e lo ricibi un “client identification card” di FPNC.
Tene na cuenta cu FPNC tin e responsabilidad di percura pa e fondonan ta yega na e famia cu mas mester di dje y den su proceso lo tene hopi na cuenta si tur cliente ta cumpli cu e rekisitonan di registracion.
Gobierno di Aruba lo suministra e fondonan pa e proyecto aki y FPNC lo cuminsa e proceso pa ehecuta e parti operacional di e proyecto (esta compra di productonan, almacena, pakete y distribucion) pa asina e ayudo por yega na e famianan concerni. FPNC lo informa tur cliente ki dia y na unda e lo ricibi su pakete di cuminda.
Atentamente,
TEAM FPNC