Home » 2 aña y 8 luna di prison pa homber cu a tira riba cas di hende cu revolver

2 aña y 8 luna di prison pa homber cu a tira riba cas di hende cu revolver

by Admin
0 comment 52 views

ORANJESTAD – Awe mainta Hues a dicta sentencia den e caso penal contra e hoben Z.C., y e homber A.S. Ambos ta wordo acusa cu riba 13 Juli 2020 a purba mata e homber H. Tambe nan ta wordo acusa di posecion di arma di candela entre 22 Juli 2019 y 12 Augustus 2020.

Aruba Native por a compronde cu Hues a declara Z.C. liber di tur acusacion mientras cu A.S. a wordo condena na 2 aña y 8 luna di prison. Hues ta haya A.S. culpable di a tira dos biaha cu un revolver riba cas di H. caminda tabatin mas hende den e cas.

Algun siman pasa tratamento di e caso a tuma lugar caminda Fiscal ta haya cu tin suficiente prueba cu A.S. a tira riba e cas. E auto cu A.S. a usa pa tira riba e cas ta e auto di oma di Z.C. Fiscal no ta haya proba pa A.S. y Z.C. intento di asesinato y tampoco intento di mata. Fiscal si ta haya proba, cu A.S. a menaza y tabata den posecion di arma di candela. Fiscal a bisa cu e no ta haya cu Z.C. ta complice di e tiramento pero si complicidad di arma y auto cu a facilita A.S. Fiscal a exigi pa A.S. 3 aña di prison y pa Z.C. 360 dia di prison di cual 168 dia ta condicional cu un tempo di prueba di 2 aña y bou guia di Reclasering. Esey ta nifica cu Z.C. no mester bolbe bay sera. Fiscal tambe a bisa cu e auto confisca por bay serca e oma.

CASTIGO
Via video conferencia Hues a bisa e sentencia pa A.S. cu tabata na KIA mientras cu Z.C. tabata presente. Hues a bisa cu e acusacion ta cu riba 13 Juli 2020, A.S. a purba kita bida di H. of menace y poseccion di arma candela. Hues no ta haya proba intento mata H. pero si proba cu A.S. a menaza H. y su mama y su yiu door di tira cu e arma 2 biaha riba cas di H. Tambe Hues ta haya proba cu A.S. tabatin un revolver y bala den su poder. Na opinion di Hues, esaki ta un caso hopi serio. A tira riba un cas caminda tin hendenan ta biba aden. Esaki ta trece hopi angustia no solamente na e cas sino den e bario. Hues a condena A.S. na 2 aña y 8 luna di prison.

Pa loke ta Z.C., Hues a bisa cu e ta comparti opinion di Fiscal y abogado cu no por considera Z.C. complice di a tira riba e cas. E no tabata hunto cu A.S. y pesey Hues a declara Z.C. liber. Hues a mustra cu e discusion den Corte ora di tratamento di e caso tabata, si Z.C. ta complice door cu a facilita e auto y arma. Hues ta haya cu den whatsapp Z.C. ta splica di e fiamento di e placa y e gun. Esey ta nifica cu e arma no tabata di Z.C. y no por a facilita A.S. e arma. Esey ta nifica cu Z.C. no ta complice di posecion di arma di candela. Hues a declara Z.C. liber di tur acusacion. E auto lo wordo debolbe na e oma.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio