Home » Nan ta culpable di asalto arma brutal y tira un hende tres biaha, Hues a baha pisa riba trio cu castigo di 13, 9 y 8 aña di prison

Nan ta culpable di asalto arma brutal y tira un hende tres biaha, Hues a baha pisa riba trio cu castigo di 13, 9 y 8 aña di prison

by Admin
0 comment 92 views

ORANJESTAD – Awe mainta Hues di Corte di Husticia a dicta sentencia pa un cuater acusador di cual un trio a haya condena di 13, 9 y 8 aña di prison mientras cu un otro cu lo a yuda cu un asalto a haya 2 aña y 6 luna di prison.

Arubanative.com por a compronde cu tratamento di e caso aki tabata algun siman pasa caminda Fiscal a baha pisa riba e hombernan D.B., N.P., H.H. y D.R. y a exigi castigo di 15, 13, 12 y 4 aña di prison.

Fiscal a menciona e asalto riba e homber P. (81), e tiramento di Venezolano den lomba, cumpramento di cosnan horta. El a cuestiona e forma cu e grupo a maltrata P. di 81 aña y ta un milager cu P. a keda bibo. Fiscal a bisa cu e Venezolano a wordo secuestra y ta un milager cu e no a muri. Un bala ta den un weso di lomba y ta un riesgo pa saca esey pasobra e lo por keda handicapped. Fiscal ta haya cu e tiramento di D.B. ta un intento di mata. Tres biaha a tira y tres herida den lomba di victima C.D.O. E ta haya cu N.P. y H.H. ta complice di intento di mata.

Pa cu e castigo, Fiscal a bisa cu e ta tene cuenta cu D.B., N.P. y H.H. tin carchi di castigo. Fiscal a exigi pa D.B. 15 aña di prison, pa N.P. 13 aña di prison, pa H.H.12 aña di prison y D.R. 4 aña di prison.

E sentencia awe mainta tabata via video conference. Ta asina cu den e grupo aki tin algun cu tin problema cu otro. Pesey na KIA a tuma medida di seguridad special.

Hues den su evaluacion ta mustra cu e ta haya legalmente proba cu riba 15 Augustus 2020, e trio N.P., D.B. y H.H., a haci e asalto arma y brutal na cas di e homber P. di 81 aña.

Hues a cuestiona e asalto arma brutal aki. El a mustra cu D.B. diferente biaha a dal e victima P. cu un bara di hero na cabez, mientras cu H.H. a mar’e y despues nan a bay cu joyas y otro cosnan for den e cas. Hues a bisa cu e ta tuma nan na malo pa esaki. Hues a mustra cu N.P. tambe ta culpable di e ladronicia dia 29 Augustus 2020 na un cas na Esso Heights.

Hues ta haya legalmente proba cu e trio aki ta complice cu riba 4 September 2020, a haci asalto arma y purba mata e homber Venezolano C.D.O. Tambe cu nan a sende un auto na candela y posecion di arma di candela. Hues a mustra cu N.P. hunto cu D.B. a bay riba C.D.O. y a bin cu e idea cu mester mata C.D.O. pasobra el a mira nan cara. C.D.O. a logra sali core y D.B. a tir’e 3 biaha den lomba.

Pa loke ta D.R., Hues a mustra cu D.B. y N.P. a bay serca D.R. pa un ganga y el a duna number di cellular di C.D.O. pa nan haci un hit di droga. Hues ta haya cu D.R. tabata sa cu nan lo bay asalta C.D.O. Hues ta haya cu D.B. ta e iniciador cu a dal e homber P. cu bara di hero y a tira C.D.O.

Hues a condena D.B. na 13 aña di prison, N.P. na 9 aña di prison, H.H. na 8 aña di prison y D.R. na 2 aña y 6 luna di prison. Hues a bisa tambe cu e trio lo mester bay paga demanda di daño. E no a menciona suma pero a bisa cu tur cos ta specifica den e sentencia.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio