Gobernador di Aruba, Su Excelencia Alfonso Boekhoudt, riba diabierna 21 di mei a realisa un bishita di trabou na Marinierskazerne Savaneda (MKSAV) den cuadro di un ceremonia di huramentacion. Como ultimo paso pa oficialmente forma parti di ARUMIL, ocho militar a haci promesa of a huramenta, den presencia di nan famia.
Prome cu a yega na e momento aki, e militarnan a sigui un curso di seis luna na Corsou. Despues di a finalisa esaki exitosamente na maart ultimo, nan a ricibi nan baret. Despues di un siguiente curso cortico mas na Aruba nan ta finalisa e trayecto awe cu nan huramentacion. Cu esaki e militarnan ta hura pa lealtad na Rey Hulandes, obediencia na e leynan y sumision na e disciplina militar. Na final di e ceremonia, Gobernador Boekhoudt a papia un rato cu e militarnan cu a huramenta, despues di cua a acompaña Gobernador pa A-1 pa su partida for di kazerne.
