Excelente noticia pa deporte di Aruba!
Recientemente e Para-Atleta Elliott ‘Lefty’ Loonstra a ricibi confirmacion oficialmente pa competi na e weganan Paralympico 2020 +1 na Tokio Japon. Esaki ta haci Elliott Loonstra e prome atleta na Aruba pa wordo invita pa bay competencianan na Japon. E weganan Paralympico na Japon lo tuma lugar di 24 di augustus pa 5 di september 2021. E weganan aki a wordo posponi un aña pa motibo di Covid-19. E edicion di e weganan aki lo no permiti publico en general como medida di prevencion y tecnologia di ultimo generacion lo wordo usa pa transmiti via online, varios medionan social y televisión.
Elliott Loonstra no ta un persona desconoci na Aruba. E ta e prome Para-Atleta di Taekwondo na Aruba cu a competi na varios competencianan internacional di Para Taekwondo y a trece un medaya di plata y dos di brons pa Aruba. Actualmente su ranking mundial den Para-Taekwondo ta 19. Ainda e posibilidad ta existi pa Elliott por participa den Para Taekwondo na Tokio Japon como cu dia 7 di juni venidero e decision lo wordo tuma entre Federacion Mundial di Taekwondo y Comite Paralympico Internacional. Despues di mas di tres aña di train duro hopi disciplina y dedicacion y apoyo di su famia su coach Luciano Mazzeo a logra e objetivo di participa den e weganan 2020 +1 Paralympico na Tokio Japon.
Ademas di Para Taekwondo, Elliott recientemente a cuminsa train atletismo, specificamente Javalina y Kogel. Esaki na peticion di Comite Paralympico Aruba cu a mira gran potencial den Elliott door di su disciplina y dedicacion. Na April ultimo Elliott a representa Aruba na e 2021 World Para Athletic Grand Prix na Jesolo Italia y a sa di gana prome lugar den Discus, di cinco lugar den Javalina y di cuater lugar den Kogel. Mester menciona cu pa a cuminsa train atletismo den un tempo relativamente corto ta di admira con bon su desempeño tabata. Esaki tabata su prome competencia di atletismo internacional y clasificacion den e categoria F46. Cu e exitonan aki Elliott a logra cumpli cu e criterianan cu ta wordo exigi pa competi na Tokio Japon. Dia 25 di mei venidero Elliott y su coach Luciano Mazzeo lo biaha pa Merca pa competi den e 2021 Arizona Desert Challenge den e categorianan di Javalina y Kogel.
Tokio 2020 +1 ta e di dos biaha cu Elliott lo ta e unico para atleta representante di Aruba na weganan di tal magnitud cordando cu na 2019 tabata e debut di e deporte Para Taekwondo na e 2019 Para PanAmerican Games cu tuma lugar na Lima Peru di cual Elliott a participa den e categoria K44 +75 kilo.
Nos ta felicita Elliott Loonstra cu e logro grandi aki y nos ta sumamente orguyoso di nos atleta local cu a sa di lucha duro pa logra su meta cual ta e 2020 +1 Tokio Paralympic Games.
Tur clase di exito na Elliott ‘Lefty’ Loonstra.