Oranjestad: Diaranson den oranan di atardi, Ministerio Publico a informa na prensa cu Sr. Pieter Susebeek su detencion a keda prolonga, mirando cu su dianan a yega y no por keda mas cera den un cel na warda di Polis. Susebeek a wordo traslada pa K.I.A.
Tambe Ministerio Publico a informa cu manera ya caba nos a publica, cu e siman aki Landsrecherche a detene e homber F.E. como sospechoso den caso Avestrus. Desde inicio di e caso ocho sospechoso a keda deteni, di cual tres persona ta sigui den detencion, esta M.L.A., F.F.A. y P.T.A.S. y e tres sospechosonan aki ta cera na K.I.A.
E sospechoso Sr. Freddy Every ta cera na Warda di Polis y ta wordo traslada pa oficina di Landsrecherche pa interogacion. Otro siman lo tuma e desicion si Freddy Every tambe ta bay K.I.A. of ta wordo laga den libertad, pero ta keda un sospechoso pendiente pa cualke interogacion mas of dia e mester presenta den Corte.