ORANJESTAD, Aruba – Recientemente e consul general di Gobierno di Merca, staciona na Corsou, responsabel pa e islanan den Caribe Hulandes, esta Allen Greenberg, tabata di bishita na oficina di Aruba Hotel & Tourism Association (AHATA). Ey e diplomatico Mericano a topa cu Tisa LaSorte, e CEO di AHATA, kende a yam’e un caluroso bonbini na Aruba y a delibera riba metanan di interes comun.
Topiconan cu AHATA a trata cu e consul Mericano tabata entre otro riba desaroyonan cu turista di Merca pa Aruba, inversion Mericano na Aruba, desaroyonan cu Pre-Clearance di migracion di Merca na Aruba y e maneho di pandemia. “E tabata un combersacion hopi positivo cu intencion di sigui colabora”, asina Tisa LaSorte a duna di conoce despues di e encuentro ameno aki.
Regularmente AHATA, siendo e asociacion cu ta representa henter e industria di turismo di nos isla, ta delibera cu varios departamento di gobierno local, cu entidadnan local, otro organisacionnan y tambe cu representantenan diplomatico di otro paisnan. Y separa di mantene relacion estrecho na nivel local, tambe AHATA ta forma parti di otro organisacionnan di turismo den Caribe, Europa, Merca y na nivel mundial.
Aruba Hotel and Tourism Association (AHATA) ta representa e sector turistico di nos pais desde su fundacion na aña 1965. Actualmente AHATA ta conta cu mas di 120 miembro y ta responsabel tambe pa e “Aruba Casinos Association” y e “Aruba Hospitality and Security Foundation”. Su rol primordial ta di ta e bos pa crecemento sostenibel pa tur su miembronan. Pa mas informacion por subi www.ahata.com.
