Home Local Un logro relevante: Website di Codigo di Proteccion ta online y...

Un logro relevante: Website di Codigo di Proteccion ta online y accesibel pa tur profesional

SHARE

Oranjestad – Aruba: Dia 1 di april di e aña aki e Decreto Nacional di Codigo di Proteccion a drenta na vigor. Dialuna 10 di mei 2021 Minister Glenbert Croes conhuntamente cu e team dinamico di Codigo di Proteccion, bou liderasgo di coordinador nacional di implementacion di Codigo di Proteccion, Sue-Ann Ras, a lansa e website di Codigo di Proteccion, cu lo fungi como un herment principal pa tur nos profesionalnan den veld. 

Codigo di Proteccion ta un di e proyectonan cardinal y un di e logronan grandi di Sociaal Crisis Plan. 

 

Kico ta e Ley di Codigo di Proteccion?

E Ley di Codigo di Proteccion ta un plan di 5 paso, unda ta describi con un profesional mester anda cu e señalnan di (sospecho di) abuso di mucha.

 

E motibo pa introduci Ley di Codigo di Proteccion

E casonan di abuso di mucha na Aruba ta preocupante. Y no por descarta cu e Tratadonan Internacional como tambe nos leynan local, e.o. netamente e Tratado Internacional di derecho di mucha (art. 19) ta obliga nos como pais pa tuma tur medida necesario y adecuado, huridico y gubernamental pa protega nos muchanan contra tur forma di e.o. violencia fisico y mental. Banda di esey tin e rapport di UNICEF for di 2012, cu a indica bon cla cu nos pais ainda no ta cumpli cu e tema di proteccion di nos muchanan contra tur forma di abuso. Un rapport cu a keda scondi y neglisha! E suceso lamentabel y tragico di abuso di mucha na 2017.

 

Kico Ley di Codigo di Protecciion ta encera

E articulonan relevante di Buki 1 BWA ta articulo 243, cual ta na vigor desde 1 di juni 2019. Articulo 243 ta indica e.o. kico ta compronde bou di abuso di mucha y cu mester apunta un instancia cu lo fungi como e AMK of e ‘Advies-, en Meldpunt voor Kindermishandeling’. Bureau Sostenemi ta apunta como e Advies en Meldpunt Kindermishandeling (AMK) pa Aruba. Articulo 243 d ta ofrece un base di delegacion (delegatiegrondslag) pa elaboracion di e reglanan di Codigo den un Decreto Nacional (Lbham), cual a drenta na vigor desde 1 april 2021.

 

E regulacion di e pasonan di Codigo ta encera tambe cu mas grupo di profesional cu ta traha cu mucha, ta obliga pa sigui e pasonan di Codigo di Proteccion, ora nan tin preocupacion, señal of sospecho di abuso di mucha.

 

COLABORACION AUGEO Y UNICEF

Dos partner importante den henter e proceso di desaroya e website tabata Augeo Foundation y UNICEF NL. Ambos partner a brinda nan sosten y ayudo tecnico, pa Aruba por tin un website relevante y atractivo den contenido pa e profesionalnan na Aruba. Ambos partner di Hulanda ta sumamente orguyoso cu e desaroyo y lansamento di e website. Manera Augeo Foundation a indica den su video, e nomber Codigo di Proteccion ta un excelente escogencia, paso e ta referi na brinda proteccion y siguridad na nos muchanan. 

 

E website di Codigo di Proteccion ta specialmente dedica na tur nos profesionalnan den 4 sector: Social, Enseñansa, Husticia y Salubridad Publico. Nan por haya mayoria informacion tocante Codigo di Proteccion y henter su implementacion y desaroyo. E website tin diferente tab cu por klik riba dje, p’asina bo keda informa y hasta tin e seccion di haci test di Codigo di Proteccion, como tambe e preguntanan frecuente y nan contestanan. Por bishita nos website www.codigodiproteccion.com

 

Codigo di Proteccion / Sociaal Crisis Plan 10/05/2021