Home Local Freddy Every, Chief of staff di ex Minister Benny Sevinger di A.V.P....

Freddy Every, Chief of staff di ex Minister Benny Sevinger di A.V.P. deteni

SHARE

Oranjestad: Diamars mainta trempan, un biaha mas Landsrecherche a sali busca un persona mas relaciona cu e caso Avestruz.  E biaha aki ta trata di Chief of Staff di Ex Minister Benny Sevinger, Sr. Freddy Every.

Algun aña atras, varios informacion a mira lus di dia, e informacionnan aki tabata referente terenonan cu lo tabata wordo pasa pa un of mas persona y nan lo tabata haya cumprado pa nan, esaki tabata sosode, te hasta prome cu nan wordo oficialmente pasa. E terenonan aki segun investigacion lo tabata wordo haya contra tur regla y proceduranan vigente.

Entre e informacionnan y pruebanan cu tabata sali na cla, a sali algun corespondencia via email, entre Leoncita cu Sr Every, cu tabata basta comprometedor.

Den e email aki por a lesa con Leoncita Arends tabata pidi Sr. Every pa intermedia encuanto e terenonan na Barcadera/Balashi, cu lo mester a bay riba nomber di un otro familiar di Leoncita, e lo a haya e terenonan aki via Franklin Abath y cu aprobacion di ex Minister Benny Sevinger.

Segun nos a compronde cu e Chief of Staff, Sr.  Freddy Every tabata un di e facilitator nan di e compania di Leoncita Arends yama Mantbraca.

Por bisa cu Sr. Every ta un persona hopi yega na e partido politico A.V.P. y muy en especial e candidato di A.V.P. , ex Minister Benny Sevinger.

Sr. Every lo wordo interoga te den oranan di atardi y lo mester presenta dilanti Sub Fiscal na Landsrecherche, cu lo dicidi si e lo wordo encarcela of lo wordo laga den libertad, pero tambe e lo keda un sospechoso mas, den e caso hopi grandi di corupcion cu tereno di land Aruba. Su prolongacion di detencion lo ta depende di su cooperacion cu autoridad, si ta lag’e deteni pa mas interogacion of por wordo laga den libertad, pero e sospechoso lo mester keda pendiente pa mas interogacion of dia cu e lo mester presenta den Corte.

Te na e momentonan aki tin 8 persona sospechoso den un di e casonan mas grandi di corupcion na Aruba, yama caso di Avestruz, tur e 8 sospechosonan aki  a wordo encarcela.

Richardson, Franken Werleman, Nuñez a recobra tanten nan libertad, pero ta keda sospechoso den e caso aki y posibelmente nan lo mester keda pendiente pa mas interogacion of pa e dia cu nan mester presenta den corte y haya nan sentencia.

Nos ta recapitula:
E prome sospechoso cu a keda deteni ta R.Richardson, yiu muhe di Leoncita Arends.
E di dos ta sr. Jeff Franken, cu lo a haci algun negoshi pa Leoncita Arends.
Di tres persona cu a keda deteni den e caso grandi di corupcion cu terenonan di land Aruba, ta Leoncita Arends
E di cuater y cinco sospechoso deteni den caso avestruz, ta Nina Nuñez y Gaby Werleman, Gaby tambe ta un persona prominente y ex candidato di A.V.P.
Di 6 persona sospechoso den caso Avestruz, ta ex director di D.I.P. Sr. Franklin Abath. E tabata e persona cu tabata duna Leoncita e opcionnan pa e terenonan
Di 7 persona sospechoso, ta Sr. Pieter Susebeek, tambe lo a haya varios tereno contra tur regla y procedura vigente. Pieter Susebeek ta un bon amigo personal di ex Minister Benny Sevinger.
Awe di 8 persona sospechoso den e caso di Avestrus a wordo deteni, Sr. Freddy Every kende tabata e Chief of Staff di ex Minister Benny Sevinger.

Durante awe of mayan desicion lo mester cay si Pieter Susebeek su detencion lo keda prolonga y si ta asina e lo wordo traslada pa K.I.A. mescos cu Leoncita y Franklin Abath. SI e wordo laga den libertad, e lo keda un sospechoso den Caso Avestruz y mester keda pendiente pa cualke interogacion of ora su caso bin dilanti.