Home » Prome Minister Evelyn Wever-Croes – LANSAMENTO DI CAMPAÑA DI CONSCIENTISACION TRAFICACION Y CONTRABANDO DI HENDE

Prome Minister Evelyn Wever-Croes – LANSAMENTO DI CAMPAÑA DI CONSCIENTISACION TRAFICACION Y CONTRABANDO DI HENDE

by Admin
0 comment 93 views

 

“Traficacion di hende ta un delito contra e derechonan humano cu tur hende mester bringa”

 

Dialuna mainta, Prome Minister Evelyn Wever-Croes hunto cu Minister di Husticia Andin Bikker, tawata invita na e lansamento di e campaña di conscientisacion di traficacion y contrabando di hende. Esaki a tuma luga cu un video cortico na Imax Theatre Gloria. Prome Minister na e ocacion a probecha den su discurso, pa enfatisa riba e hecho castigabel aki na unda cu desde comienso di gobernacion, Gabinete Wever-Croes a pone e debido atencion na e problematica aki. 

Problematica di e crisis di Venezuela y su impacto akinan na Aruba ta algo cu desde e prome dia di gobernacion di Gabinete Wever-Croes, tabata un punto di prioridad riba agenda. E magnitud di e crisis migratorio aki tur hende por a sinti’e na Aruba. El a bira bisto y nos mester a haci algo. Aparte di esey, Aruba tabata tin su mesun crisis financiero, crisis social sinembargo, e crisis di Venezuela aki mester a haña su atencion urgente. 

Mirando e intensidad di e trabou tanto local entre e autoridadnan migratorio pero tambe internationalmente cu organisacionnan cu ta bringa pa protehe derecho humano, Prome Minister a apunta dos ‘ketenmanagers’ na principio caba pa por atende cu e crisis aki. Sra Gina Lopez, cu awe ainda ta encarga cu e trabou aki di Andy Lee cu te cu fin di aña pasa tambe tabata den e funcion aki. Nan prioridad tabata pa mantene un bon relacion cu organisacionnan local y international y pa por pone atencion inmediato na e retonan riba e tereno aki. 

Awe e retonan riba e crisis migratorio a haña nan atencion. Aruba a haña ayudo di Gobierno Hulandes di cual nos ta hopi agradecido. Na mei di 2018 durante bishita di Prome Minsiter na Hulanda, el a haci un peticion pa asistencia financiero pa atende cu e impacto di e crisis migratorio di Venezuela na Aruba. E tempo ey Hulanda no tabata convenci cu e ta un asunto local pero poco poco papiando di e tema den eerste kamer, tweede kamer y tur otro oportunidad cu nos a haña, a logra pa Hulanda aproba un suma di 23 miyon euro pa atende cu e impacto di e crisis di Venezuela den e islanan. 

E suma aki a wordo reparti riba diferente categoria y finalmente e suma cu tabata tin pa Aruba por atende cu e crisis aki tabata 7 miyon euro. Aruba mester a presenta diferente proyecto pa asina por demostra con esakinan por mitiga e problemanan cu ta wordo causa na Aruba y con por atende cu e problemanan cu ta wordo causa p’e crisis. Na final un total di 41 proyecto a wordo aproba cual 28 di nan ta den categoria di ‘vreemdelingen keten’ y 13 di nan den categoria ‘overige’ cu ta entre otro educacion, labor y siguridad. 

E 28 proyectonan cu ta den categoria di ‘vreemdelingen keten’ di cual mi kier gradici colega minister Andin Bikker hunto cu tur e otro departmentonan cu a traha hopi duro pa e proyectonan aki wordo aproba. Bureau Rampen Bestrijding Aruba ta esun cu tin e coordinacion principal y tambe ta responsabel pa por maneha e fondonan. Pa cada categoria e ‘vreemdelingen keten’ y pa ‘overig’ a nombra un coordinador specifico. Aparte di esey tambe tin gruponan di trabou interdepartamental cu tin mas di 2 aña trahando den ehecucion di cada un di e proyectonan aki. 

E pandemia berdad a causa un retraso tanto na Hulanda como na Aruba pero un gran parti di e proyectonan ta andando y ta casi den fase final. 

“Un aspecto tristo, peligroso y preocupante di e crisis migratorio ta e traficacion y contrabando di hende, mensenhandel, mensen smokkelen. Traficacion di hende miho conoci como esclavitud moderno, ta un delito contra e derechonan humano y esey ta algo cu mi kier haci un apelacion riba tur hende pa bring’e. E delito aki ta causando y costando hopi victima rond di mundo y Aruba probablemente no ta un excepcion. Como gobierno responsabel di e pais aki, nos no por para un banda y laga esaki pasa. P’esey e campaña aki di conscientisacion ta hopi importante. Nos ta trata di hende y nos mester evita esaki pasa den nos pais. Sea ta nos mesun hendenan of imigrantenan cu ta wordo abusa door di nos mesun hendenan, esaki ta un fenomeno cu mester wordo bringa. 

Awe ta lansamento di campaña di conscientisacion. Mi kier a gradici tur esnan cu ta envolvi den e organisacion y pa tur e esfuerso duna pa yuda bringa e negoshi sushi aki. Esaki ta algo cu ni gobierno, ni nos, ni boso por haci’e boso so. Nos mester di henter e comunidad di Aruba”, Prome Minister Evelyn Wever-Croes a termina bisando. 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio