ORANJESTAD – A.T.A. ta desea pa informa nos comunidad di e situacion actual pa loke ta trata e industria turistico, conforme informacion compila na e momentonan aki.
TURISMO ‘STAY-OVER’
Durante luna di april 2021 nos isla a yama bonbini na un total di 58.774 bishitante ‘stay-over’. Di e bishitantenan aki, 53.556 tawata procedente di Norte America y 2.530 tawata procedente for di diferente paisnan Europeo. 1.655 bishitante tawata procedente di Latino America y 1.033 bishitante di otro pais/islanan den region.
TURISMO CRUCERO
E industria di crucero a paralisa desde inicio di e pandemia.
E situacion di e barconan cu por mira staciona den nos waf ta un asina yama ‘warm lay-up’ cual kiermen cu e barco ta riba un standby, wardando riba instruccion na momento cu operacionnan re-inicia. E actividad aki ta produci cierto entrada pa nos economia entre otro unda e barconan ta abastece nan productonan localmente. No tin turista riba e barconan pero solamente e minimo na tripulante (skeleton crew) y nan mester cumpli estrictamente cu tur protocol local y internacional pa loke ta e pandemia actual.
KICO POR SPERA PA E RESTO DI 2021?
Basa riba diferente desaroyo actual y tambe analisisnan pa loke ta trata e transporte aereo, ta observa e forecast pa e di dos kwartaal. E proyeccionnan ta mustra un crecemento di entre 15% pa 37% compara cu e prome kwartaal di 2021 durante cual A.T.A. a ricibi un total di 112,317 turista. E proyeccion revisa ta brinda indicacion cu Aruba lo por ta cerando 2021 conforme e scenario ‘cautelosamente optimista’ (recuperacion vs. 2019: 55%) na luga di e scenario ‘conservativo’ (recuperacion vs. 2019: 45%). Ora compara kwartaal 1 di 2021 cu kwartaal 1 di 2020, esaki ta mustra un grado di recuperacion di 49%. Y si compara esaki cu kwartaal 1 di 2019, e grado di locual a recupera den kwartaal 1 di 2021 ta di 38%.
TOURISM CREDITS / CENTRAL BANK OF ARUBA
Di acuerdo cu Banco Central e asina yama ‘Tourism Credits’ (cual anteriomente tawata wordo yama ‘Tourism Receipts’) pa aña 2020 a contribui cu AWG 1.905.2 miyon den nos economia, cu ta 49% menos compara cu 2019. Esaki naturalmente ta debi na e pandemia global di Covid-19 unda Aruba tambe a cera su fronteranan temporalmente cual a inicia na luna di maart 2020 te cu juli 2020.
Mescos cu otro destinacionnan, nos isla ta pasando den momentonan di reto pa loke ta trata e pandemia aki.
Sinembargo, por mira claramente cu e impacto di e vacuna ta hungando un papel positivo. Tambe e participacion di gran parti di nos comunidad pa loke ta trata pa mantene nos mes na e protocolnan estableci door di diferente instancia ta dunando su frutonan pa asina baha e cantidad di casonan positivo di Covid-19 na Aruba. Y cu esaki poco poco nos economia ta recuperando.
Hunto nos lo vence y nos isla y su turismo lo sigui florece.