Home » Diesdos partido politico a entrega nan lista pa participa na e elecion venidero, dia 25 di juni 2021

Diesdos partido politico a entrega nan lista pa participa na e elecion venidero, dia 25 di juni 2021

by Admin
0 comment 66 views

Oranjestad: Diabierna 07 di mei 2021, tabata e dia cu partidonan politico mester a entrega nan lista pa asina nan por participa na e elecion venidero, dia 25 di juni 2021.

E prome partido cu a entrega lista tabata Accion21, nan lista a wordo entrega 9’or di mainta, sigui pa P.P.A. cu a entrega su lista 9’or y mey, despues Pueblo Prome pa 10’or. Red Democratico a entrega su lista 10’or y mei, U.P.P. a entrega su lista 11’or y M.E.P. a entrega su lista pa 11’or y mey. 12’or di merdia a toca turno na partido C.U.R.P.A.
1’or di merdia a sigui cu M.A.S., Partido P.O.R. a entrega su lista 1’or y mey, sigui pa H.T.C. cu a entrega nan lista 2’or di merdia.
A.V.P. tabata e ultimo partido cu entrega lista cu tabata 3’or y mey di atardi.

E unico partido cu a entrega su lista via email, tabata e partido RAIZ, pero lo a pasa personalmente check si nan lista a wordo ricibi.

Diabierna tabata un dia hopi mas druk cu normalmente den centro di Oranjestad, pa motibo cu e camindanan rond di e edificio di Censo tabata cera pa trafico.  Tur cos a bay hopi trankil y civiliza. E dos partidonan grandi tabata tin hopi auto cu tabata circuland riba caminda decora cu material di campaña.

For di trempan por a mira hopi auto decora cu material di campaña geel, esaki tabata pasobra den careda di 8’or y mey di mainta e partido politico M.E.P. a sali for di San Nicolas, pasa Savaneta, Santa Cruz, Paradera, Noord direccion playa. Na plaza Libertador Betico Croes, e algun auto a pasa saluda y sigui, pero un cantidad grandi a para eynan pa warda riba yegada di Sra Evelyn Wever Croes.
For di Plaza Betico, Lider di M.E.P. a sali den auto bay direcion di Censo. Pa 11’or y mey exacto Sra Evelyn Wever Croes, acompaña pa Sr. Hendrik Tevreden, presidente di partido, a entrega e lista di candidatonan di M.E.P.

A.V.P. a sali for di cas di partido, mescos cu M.E.P. for di trempan por a mira autonan decora cu material di campaña, coriendo rond den cayanan di Oranjestad. Un grupo grandi di auto decora cu material di campaña  a sali bay dilanti Wilhelmina Park, for di Wilhelmina Park un grupo a cana bay cu Sr. Mike Eman Lider di A.V.P. bay entrega lista. Sr. Mike Eman a wordo acompaña pa Sra. Gerlien Croes pa entrega e lista di candidatonan di AVP.

Henter dia tabata tin polis staciona na diferente caminda den centro di cuidad y tambe por a nota cu na momento cu e dos partidonan grandi, M.E.P. y A.V.P. tabata entregando lista, e helicopter di polis tabata patruyando riba Oranjestad.

Tur cos a bay trankilo, no tabata tin niun incidente serio. E unico problema cu e trafico den Oranjestad tabata stagna door di e ceramento di camindanan pa trafico.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio