ORANJESTAD, ARUBA – Fundacion Parke Nacional Aruba (FPNA) ta orguyoso pa organisa e prome curso pa monitor rif di coral e siman aki, hunto cu facilitadornan – biologonan marino Tadzio Bervoets di Dutch Caribbean Nature Alliance (DCNA) y Roxanne-Liana Francisca di STINAPA Boneiro. Cursistanan cu ta participa ta representantenan di FPNA, JADS, ScubbleBubbles, Caribbean Lionfish Alliance (CLA), Aquawindies y Directie Natuur & Milieu (DNM).
Durante e curso di cuatro dia e cursistanan – tur divers certifica – lo wordo entrena pa colecta data siguiendo standardnan y practica pa monitor rifnan di coral di Global Coral Reef Monitoring Network (GCRMN) y di Atlantic and Gulf Rapid Reef Assessment (AGRRA). Banda di wordo entrena den e criteria pa monitor, tecnica y protocol, cursistanan lo wordo entrena tambe pa indentifica pisca, coral, invertebrato, alga, malesa di coral, y especienan invasivo – cu ta crucial pa monitor e bida di e rifnan di coral.
Rif di coral ta un ecosistema cu posibelmente tin e biodiversidad mas halto compara cu cualkier otro ecosistema na mundo. Banda di ta increibelmente bunita, varia, y ta anfitrion di un variedad asombroso di bida marino, rif di coral ta esencial pa e economia di Aruba. Rif di coral ta proteha nos costa di mal tempo y ta un zona di cria y hogar pa diferente especie di importancia vital pa pesca. Rif di coral y su piscanan unico ta provedor di Aruba su playanan bunita di santo blanco cu turista di tur parti di mundo ta bin disfruta. Sinembargo, rif di coral y su habitantenan ta wordo menasa pa desaroyonan na costa, recreacion marino y na costa, actividanan maritimo, y polucion di tera, aire y lama, y otro impactonan.
FPNA su Marine Park Manager interino Sietske van der Wal ta entusiasma pa porfin por cuminsa colecta data na un manera mas structural. “FPNA ta maneha cuatro Area Marino Protehi cu colectivamente ta wordo yama Parke Marino Aruba. Nos ta e unico pais den Reino cu no ta structuralmente monitor e bida di e rifnan di coral ainda y cu e curso aki nos ta haya e habilidad pa haci esaki nos mes.”
Despues di e curso aki, FPNA – hunto cu e aliadonan – lo inspecciona e rifnan di coral cada dos aña na ubicacionan representativo y asina por determina e estado di Aruba su rifnan, compara data despues di tempo y adapta maneho respectivamente. Data lo wordo comparti cu entre otro DCNA y GCRMN pa por sigui tendencianan na nivel nacional, den Reino y regional. E data colecta durante e inspeccionan lo wordo incorpora den e maneho di Parke Marino Aruba.
FPNA ta aprecia y ta agradecido na tur e facilitadornan y participantenan pa nan sosten pa hasi e curso aki posibel y uno exitoso – sea den forma financiero, di equipo y transporte, of dor di dedica tempo y esfuerso.
