Home Police Na Barceló, polis mester a atende cu un turista cu a bira...

Na Barceló, polis mester a atende cu un turista cu a bira agresivo, despues cu su mama a fayece den su camber di Hotel

SHARE

Palm Beach: Diasabra algo despues di 10’or y mey di anochi, presencia di ambulance a wordo pidi cu urgencia na Hotel Barceló pa un señora cu no lo ta dunando señal di bida.

 

Na yegada e paramédiconan di ambulance a haya nan confronta cu un situacion hopi tenso, un homber a lanta cu e paramediconan y tambe cu personal di e hotel. Mesora e hotel a pidi asistencia di polis.

Varios unidad di polis di Strand y di districto di Noord a yega na e hotel Barceló, pa asina trata na controla e situacion cu lo tabata bayendo for di man. Polis a subi na e piso caminda e turistanan ta hospeda y a detene un persona cu no kier a rasona.

Transportwagen di districto di Noord a presenta na e hotel, cu e intencion di transporta e persona pa warda di polis. E homber a wordo hinca den transport, pero despues cu polisnan a papia cu e homber, e la calma, tambe e homber a splica polis cu ta su mama a fayece. Despues e la pidinan hopi sorry pa e forma agresivo cu e la expresa su tristesa na momento cu e la ripara cu su mama a fayece.

E agentenan na e sitio a duna e homber condolencia y e homber na su turno a brasa e polisnan cu sigur na e momento ey, sigur lo a sirbi pa un poco consuelo.

E homber tabata yora su mama inconsolabelmente. Leu di su famianan anto un vacación cu lo mester tabata pa relaha y disfruta den compania di su kerida mama, a caba den un tristesa inmenso.

Den careda di 11’or y 20 di anochi, dokter a presenta na e sitio, pa constata morto di e señora, tambe un rato despues, slachtofferhulp tambe a yega na Hotel Barceló, pa asina asisti e famia den su tristeza. Un funeral home a busca e curpa den careda di 12:30 a.m .