Home Local Cambio di nomber di Emma School pa Scol Soeur Juliette a bira...

Cambio di nomber di Emma School pa Scol Soeur Juliette a bira oficial

SHARE

Contrario cu e caso di Colegio Nigel Matthew, e ceremonia pa honra Soeur Juliette cu su nomber riba un scol no por a tuma luga di e mesun forma. Esaki ta debi na e situacion di COVID y pa tene cuenta cu salud di Soeur Juliette.
Minister di Enseñansa Rudy Lampe den un conferencia di prensa diahuebs mainta a anuncia y lesa decreto di e cambio di nomber di Emma School pa Scol Soeur Juliette. E decision aki a wordo tuma den Conseho di Minister den e reunion fecha 8 di januari ultimo.

E mandatario a splica cu e logo nobo ta un mescla di e scolnan Emma School como esun di Paso Pa Futuro pa dun’e un cara nobo. Ta trata di scolnan special, cu a haya cierto percepcion den comunidad. Hopi biaha tin e pensamento cu bay Emma School ta algo menos positivo. Awo kier mustra cu esaki no t’asina. Tin diferente forma di inteligencia. P’esey, el a bisa, e muchanan special nan inteligencia emocional y spiritual ta mas desaroya cu esun di otro muchanan. Cu e rebranding no kier pa wak solamente IQ di e muchanan so, pero wak e mucha di un forma integral.

E scol na su yegada mester ilustra y duna e sentimento di zona di respet y trankilidad pa tur e muchanan. E muchanan aki tin sentimento autentico y e mayornan ora di baha nan yiunan na e scol ey nan mester sinti nan mes orguyoso cu nan yiu ta asisti na e scol ey unda ta desaroya otro habilidadnan cu por ta na otro scolnan no tin.

E Bijbel di prenchi na Papiamento ta un deseo, e mandatario a splica, cu e tin pa drenta tur scol publico y e no ta pa siña religion. El a recorda cu Nacionnan Uni a bin cu e proyecto di balornan universal. Unda ta bisa cu tur religion ta comparti tur e balornan universal (10 mandamento) cu ta fundeshi di e buki mas lesa na mundo. A pone esaki na disposicion di tur scolnan publico y tambe pa e muchanan special.

E cambio di nomber tambe ta nifica e inicio di un era nobo pa enseñansa special. Pa prome biaha tin entregamento di diploma ora cu nan finalisa enseñansa primario y secundario. Pa decadanan largo esaki no tabata posibel. Muchanan special ta caba tur e scolnan, pero na final ta haya solamente un certificado. Ministerio di Enseñansa a regla cu nan tambe ta haya diploma manera tur otro mucha.
Inspector di Enseñansa ta inspecciona a constata cu e scolnan aki, mescos cu otronan, ta cumpli cu tur reglanan.

Nomber
A scoge e nomber di Scol Soeur Juliette, pa e balor cu esaki ta trece cu ne. E religioso aki a nace na Bonaire pero Aruba a bira su cas. El a sigui scol na Aruba y despues na Hulanda. A bolbe Aruba pa duna les y despues di dos aña a dicidi di drenta convento riba 30 di april, 1959. Awe ta cumpli 50 aña cu el a huramenta dilanti Dios di cumpli cu e votonan religioso, di renuncia na e bida material, castidad pa sigui idealnan di Reino di Dios y acepta e mision cu dun’e.

Zuster Juliette a cuminsa duna les na Maria College unda el a traha te cu 1978. Despues a sigui duna les na diferente instituto educativo y duna Catesashi.
Importante mas cu tur cos, e mandatario a bisa, ta e legado cu zuster Juliette a laga atras ta e parti moral y spiritual pa cual no tabatin miho hende pa pone su nomber riba e scol. “Nos ta gradici e comision cu a haci e peticion,” Minister Lampe a splica.

“P’ami ta un gran honor y un gran sorpresa ora cu Minister Lampe a informa cu un di nos scolnan lo bay carga mi nomber. Mi semper a aprecia y duna reconocemento na tur docente den enseñansa. Mi tambe a duna les na mucha y hobennan pa forma nan na prome luga como hende,” e religioso a bisa.

El a papia di desaroyo, cambionan cu mester ta na bienestar di e mucha cu ta para central den tur tipo di educacion. Y e meta ta pa saca e maximo potencial di tur mucha. El a expresa e deseo pa nan tur sigui traha cu e mesun entusiasmo di prome dia pa enseñansa, tabata e mensahe di dje na e muchanan y docentenan di e scol.