Home » Interogacionnan ta sigui den caso Avestruz, Ninosca Nuñez a wordo laga den libertad, pero ta keda un sospechoso den caso avestruz

Interogacionnan ta sigui den caso Avestruz, Ninosca Nuñez a wordo laga den libertad, pero ta keda un sospechoso den caso avestruz

by Admin
0 comment 96 views

Na 2017, e stichting NOS TA ARUBA, a entrega un peticion na Ministerio Publico, pa haci un investigacion penal contra algun cuidadano di Aruba, cu segun nan lo a of tabata haci corupcion cu ortogamento di terenonan di pais Aruba. Despues di dos aña largo, na september 2019 a cuminsa cu algun entrada hudicial y despues a keda para keto, te cu na April 2021 cu a cuminsa cu detencion, como 6 sospechoso a keda deteni.

Oranjestad: Diahuebs den careda di 9’or y 20 di mainta, transport di C.E.A. a trece sr. Franklin Abath na oficina di Landsrecherche pa sigui cu e interogacionnan.

Diaranson den oranan di mainta Sr. Franklin Abath a wordo deteni como un sospechoso den e caso Avestruz. Den oranan di diaranson atardi e mester a presenta dilanti un Sub Fiscal y su detencion a keda prolonga, supuestamente esaki lo ta na bienestar di e investigacionnan andando den e caso Avestruz.

Na augustus 2017, e stichting Nos ta Aruba a entrega un peticion na Ministerio Publico pa haci un investigacion penal contra e tempo ey, Minister di Infrastructura y Ruimtelijke Ordening, Minister Sevinger.

E stichting a menciona un lista di terenonan, cu a wordo duna un optie riba nan, den e peticion nan a menciona un tereno na Barcadera/ Balashi, supuestamente lo tabata tin konkelmente den esaki entre e Chief of staff di e Ministerio y Ex hefe di D.I.P. Sr. Franklin Abath. Segun e stichting Nos ta Aruba, e optie di e tereno aki lo tabata reserva pa Sra. Leoncita Arends su “compania” y e terenonan aki, prome di haci e tramitenan ya caba nan lo tabata tin cumprado p’e.

E Modus Operandi aki no a keda na un biaha pero segun Nos Ta Aruba, nan a sigui haci mescos cu varios otro tereno rond di nos isla, entre otro, Wayaca, Sasakiweg, Sero Colorado etc.

E compania Mantbraca di cual un tal Sr. Cabral lo tabata director y Leoncita tabata socio, tambe a wordo menciona den e peticion, segun Nos ta Aruba, Mantbraca lo a haya 4 percela/ 24.000m2.

Den e peticion di Nos ta Aruba a wordo pidi pa investiga Green Corridor y e renobacion di centro di Cuidad.

Un lista largo di cosnan cu segun e stichting Nos ta Aruba, no lo a anda corecto y señala varios ortogamento di tereno cu lo tabata tin corupcion.

E peticion di Nos Ta Aruba, pa un investigacion penal a keda entrega na augustus 2017. Despues di September 2019, Ministerio Publico a cuminsa cu entradanan hudicial. Dia 2 di oktober 2019 autoridad a haci algun entrada hudicial, na varios cas, entre otro na cas di ex Minister Benny Sevinger y cas di Leoncita Arends, tambe nan a drenta algun negoshi. Durante e entradanan hudicial aki niun persona a keda deteni.

Pa Aruba su sorpresa dia 11 di april 2021, autoridad a cuminsa cu e prome detencion den caso Avestruz, tabata trata di e yiu muhe di Leoncita Arends, Rebecca Richarson, su siguiente dia e recherchenan a detene  Sr. Jeff Franken, un socio di Leoncita di su compania Elenath V.B.A.  Diamars 13 di April, landsrecherchenan a bay pa Sra. Leoncita Arends mes.  E recherchenan a sigui cu nan investigacion. Dia 19 di april den oranan di mainta, landsrecherchenan a sali bay direccion di Piedra plat y a bay busca Sr. Gaby Werleman y su casa Ninosca Nuñez. Ambos a keda deteni y hiba pa Landsrecherche, caminda e interogacionnan tabata den full swing.

Despues di algun dia a laga Jeff Franken y e yiu muhe di Leoncita den libertad, pero nan tur dos ta keda sospechoso te ora nan mester presenta dilanti mesa berde, unda hues lo dicta sentencia.

Leoncita su detencion a keda prolonga y ta preso na K.I.A. Mescos cu Gaby Werleman, un persona prominente di partido A.V.P., un ex candidato y sigur un consehero importante den partido for di añanan 80.  Gaby tambe su detencion a keda prolonga y actualmente ta preso na K.I.A.

Ninosca Nuñez, kende ta casa di Gaby Werleman, a wordo laga den libertad, e lo keda un sospechoso te ora cu e mester presenta dilanti hues. Ninosca ta un persona cu tabata envolvi den e caso di Ibis, den caso Ibis e la keda deteni pa interogacion y durante e caso den corte a wordo haya culpabel y a keda sentencia. Ministerio Publico no lo a haya e castigo di hues suficiente y a apela.

Diaranson 28 di april, a toca turno na Sr. Franklin Abath, ex director di D.I.P. E la keda deteni na su cas y hiba Landsrecherche pa interogacion. E interogacionnan ta sigui y no ta descarta mas detencion den e dianan, simannan y lunanan nos dilanti.

 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio