Home Police Franklin. Abath (66), ex Topman di Dip/Domeinbeheer, aresta relaciona cu e investigacionnan...

Franklin. Abath (66), ex Topman di Dip/Domeinbeheer, aresta relaciona cu e investigacionnan andando den caso di Avestrus

SHARE

Oranjestad: Caso Avestrus ta den full swing y mas detencion ta sigui cay, e biaha aki ta trata di Sr. Franklin Abath (66), kende tabata pa hopi aña hefe na DIP(ex Domeinbeheer).

Diaranson den oranan trempan di mainta, un team di landsrecherche a presenta na cas di Sr. Franklin Abath. E la wordo busca relaciona cu e investigacionnan di e caso Avestrus. E la wordo hiba na e oficina di Landsrecherche pa interogacion y esaki por dura oranan largo.

Den e ultimo simannan aki, tur siman un of mas sospechoso a wordo busca pa landsrecherche y te na e momentonan aki, tur a keda deteni, dos a recobra nan libertad, esaki t’e ora cu nan mester presenta dilanti mesa berde y si acaso nan wordo haya culpabel, nan lo por spera un sentencia, cu por ta encarcelacion, boet of trabou comunitario.

E detencionnan aki mayoria biaha ta pa bienestar di e investigacion. Durante nan detencion, e sospechoso lo wordo interoga intensivamente, oranan largo, na varios ocasion y casi tur dia. Durante interogacion nan ta wordo confronta cu diferente pruebanan palpabel. E sospechosonan por wordo laga den libertad pendiente nan caso den corte, esaki posibel ora cu e recherchenan a haya  suficiente informacion for di e sospechosonan, pa nan por sigui cu e investigacion cual lo por resulta den mas detencion ainda.

Abath ta e di 6 persona cu den algun siman a keda deteni pa landsrecherche. Actualmente tin ainda tres sospechoso encarcela, cu ta Sra. Leoncita Arends, kende a wordo manda K.I.A. caba. Gaby Werleman y su sra Ninoska Nuñes, diaranson of diahuebs si nan no recobra nan libertad, nan tambe lo por wordo traslada pa K.I.A.

E otro dos personanan, Rebecca Richardson y Jeff Franken ta den libertad wardando si acaso autoridad citanan pa cualke interogacion, of dia nan mester presenta den corte.