ORANJESTAD – Recientemente Hof di Corte Superior a dicta sentencia via video conference pa e homber M.S., kende a apela su sentencia di Corte den Promer Instancia caminda el a wordo condena na 6 aña di prison pa un serie di abusonan cu el a haci.
Aruba Native por a compronde cu tanto M.S. como Procurador General a apela e sentencia di 26 Juni 2020, caminda Hues a condena M.S. na 6 aña di prison. Ta asina cu Fiscal a exigi 10 aña.
Den Corte Superior, Procurador General (PG) a mustra cu e acusacionnan contra M.S. ta:
Riba 30 Mei 2019 hunto cu su yiu homber q.e.p.d. Marlon, a viola e dama F., cu ta e amiga di Marlon;
-Na Februari 2019 hunto cu su dos yiunan homber, M.S. a viola su partner cu tabata bou influencia y incociente drumi riba cama.
-Dia 11 November 2018, el a haci acto inmoral cu su yiu muher bao di 18 aña; Diferente biaha entre October 2018 y December 2018 a saca potret di su yiu muher su partinan intimo.
PG a bisa Hof cu e motibo cu a apela e sentencia ta pasobra, PG no ta haya cu e castigo duna ta suficiente. PG a bisa cu M.S. ta culpable di tur e acusacionnan y e ta exigi 8 aña di prison.
Hof ta mustra cu e caso ta un drama. Den un periodo di mas o menos 8 luna, M.S. a haci su mes culpable di un serie di casonan di inmoralidad hopi serio.
M.S. a viola e amiga di su yiu homber. E violacion a sosode ora cu e yiu homber tabata cu e amiga den su apartamento. Hof ta haya cu M.S. a ausa di e situacion y obliga e victima di tin relacion sexual cun’e.
Ademas M.S., hunto cu su yiu homber a tene relacion sexual cu e señora di M.S. E momento ey e señora tabata hopi burachi y tabata drumi inconciente riba cama.
-M.S. a haci actonan inmoral cu su propio yiu muher y a saca portetnan pornografico di su yiu muher pa satisfase su mes.
Hof pa cu e castigo, a tene cuenta cu e raport di psychiater cu ta haya cu M.S. tin problema pa pensa normal y pesey ta haya cu M.S. ta menos responsabel pa su actonan.
Hof a mustra cu un psycologo ta haya cu M.S. ta responsabel pa su actonan y ta conseha pa pone M.S. bou guia di Reclasering. Un otro psycologo ta di e mesun opinion cu su colega.
Hof ta haya cu teniendo cuenta cu e raportnan menciona, mester pone M.S. menos responsabel pa e delitonan. Esey ta encera cu mester baha e castigo. Hof tambe a tene cuenta cu door di M.S. a viola e victima, e tata di e victima den su rabia a bay na e cas y a mata e yiu homber di M.S. Hof a sigui e conseho di e psycologonan pa pone M.S. bou guia di Reclasering pa evita pa algo asina lo por bolbe ripiti.
Hof a condena M.S. na 48 luna (4 aña) di prison, di cual 8 luna ta condicional cu un tempo di prueba di 3 aña. Esey ta nifica cu M.S. lo mester sinta den KIA, 3 aña y 4 luna. Ademas Hof a condena M.S. pa paga 5 mil florin di daño na mama di e victima. Hof a stipula e medida di pago cu ta encera cu si M.S. no paga, e lo mester bay 60 dia di prison sera.