Hubadastraat, Oranjestad: Diadomingo algo prome cu 9’or y mey di anochi. Presencia di polis a wordo pidi na comienso di Rudolf Arendstraat pa un problema di pareha cu ta bayendo for di man y cu tin un mucha chikito envolvi.
Na yegada e patruya di polis no a topa e supuesto pareha, despues di nan a wordo manda na un adres den Hubadastraat, caminda e problema aki lo a sigui. E unidadnan policial cu a yega na e adres na Hubadastraat, a bin compronde for di un dama, cu e lo a haya problema cu e tata di su yiu y e problema a bay for di man. E homber a pasa man pa nan yiu chikito y cu e mucha den brasa e homber lo a bula cura di un cas, sali den e caya patras bay. Segun testigo e homber lo a bay direcion di Caya Ernesto Petronia bay zuid.
E polisnan na e sitio mesora a cuminsa cu un buskeda den e area aki, den Santana, patras di Aruba Jrs. Venezuelastraat etc. Algo prome cu 10’or di anochi, polis a haya e informe, cu e tata, a laga un otro persona hiba e criatura bek pa su mama.