Home » Caso Avestrus in volle gang, prolongacion di detencion di ocho dia mas pa Señora Leoncita Arends(64)

Caso Avestrus in volle gang, prolongacion di detencion di ocho dia mas pa Señora Leoncita Arends(64)

by Admin
0 comment 80 views

Oranjestad:
E investigacion Avestrus ta den full swing. Landsrecherche a detene cinco sospechoso den e ultimo dos simannan aki relaciona cu e investigacion di posible delitonan di corupcion y otro hechonan castigable rond di otorgamento di terenonan di gobierno. E sospechosonan aki ta envolvi na diferente manera den e investigacion.

E prome sospechoso deteni tabata Rebecca Richardson, yiu muhe di Leoncita Arends, e di dos detencion tabata Jeff Franken. Jeff y Rebecca a wordo laga den libertad, algun dia pasa despues cu nan a wordo interoga pa autoridad, ambos lo keda sospechoso den e caso Avestrus, te ora cu tin un sentencia. Tambe si den e periodo prome cu e caso keda presenta den corte, si acaso autoridad mester di nan pa cualke declaracion, nan lo por wordo yama bek pa presenta na Landsrecherche.

Leoncita Arends (64) a wordo deteni diamars 13 di april y despues di a cumpli 10 dia encarcela na warda di polis, su detencion a bolbe keda prolonga cu 8 dia mas y a wordo translada pa KIA. Su prolongacion lo ta mas bien den interes di e investigacion, esaki hopi biaha ta wordo haci, pa e sospechoso no tuma contacto den niun forma cu e otro sospechosonan cu ainda no a keda deteni, e lo por brief nan y asina daña e investigacion.

E dos otro sospechosonan cu ainda tambe ta deteni, ta e pareha, Gaby Werleman y Ninoska Nuñes, nan a wordo deteni dialuna 19 di april na nan cas na Piedra Plat door di un team di Landsrecherche.

Tur tres ta wordo sospecha di corupcion miyonario den un of otro forma cu  bendemento di terenonan di pais Aruba, si nan a ricibi e terenonan aki ta un hende of mas hende mester a dunanan opcion riba e supuesto terenonan aki. Pasobra ni Arends, ni Werleman,  y tampoco Nuñes, Richardson y Franken, no tin acceso of autoridad pa por bende, of ortoga terenonan di gobierno sin mas.

Avestrus ta dirigi riba e pregunta si un of mas compania a sa di obtene (un opcion riba) derechonan di erfpacht di kavelnan di Pais Aruba a base incorecto durante e añanan 2009 te 2017. E eventual rol cu un ex-minister a hunga den esaki tambe ta wordo investiga.

Despues di detencion di e sospechosonan aki, mas sigur lo por bay tin mas detencion, pasobra niun di e 5 personanan aki no por yega haci doño di terenonan di pais Aruba. Si nan ta culpabel, ta un persona a dunanan e blessing pa haci esaki.

Manera Ministerio Publico a publica, cu no ta exclui cu lo bin mas detencion den e dianan nos dilanti. Especialmente ora ta menciona cu varios comerciante lo por a cumpra of a haya un di e terenonan aki na un forma no legal.

Na september 2019, e caso cu a haya e nomber Avestrus a inicia, por corda cu riba e dia aki, for di mainta trempan te atardi, tabata tin varios entrada hudicial na casnan, di entre otro di un ex Minister, na casnan y negoshinan di varios comerciantenan conoci den comunidad. Pa mas cu un aña y mey no a scucha nada mas di e caso Avestrus, te cu dos siman pasa e la lanta cabes y ta den full swing manera Ministerio Publico mes a declara diabierna merdia.

Un caso grandi cu sigur lo sigui desaroya den e dianan y simannan nos dilanti y cu lo keda marca den historia di Aruba.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio