Home Politics Minister Besaril a ricibi buki “Hulanda? Sto’i nek!” for di escritora Marhainska...

Minister Besaril a ricibi buki “Hulanda? Sto’i nek!” for di escritora Marhainska Sakoetoe

SHARE

Den Haag – Recientemente e escritora Marhainska Sakoetoe tabata di bishita na Arubahuis pa haci entrega oficial di su buki “Hulanda? Sto’i nek!” na Minister Besaril. Marhainska Sakoetoe ta un ex-studiante originalmente di Curaçao cu a studia na Universidad di Utrecht y cu ta trahando actualmente como orthopedagogo den e area di Jeugdzorg na Hulanda. Su buki “Hulanda? Sto’i nek!” ta un guia di preparacion pa (futuro) studiantenan di nos islanan di Caribe Hulandes y ta enfoca riba tur e aspectonan relevante di e bida di studiante na Hulanda. E prome version di e buki a wordo publica aña pasa na Papiamentu y mientras tanto e buki a wordo traduci y publica na Ingles cu e titulo “Holland? Say what?!”. 

 

E escritora a scribi e buki a base di su propio experencia como studiante di Curaçao na Hulanda pero ta menciona cu su inspiracion di mas grandi pa scirbi e buki ta e experencia mas recien di su ruman y su grupo di amigo cu a bin studia na Hulanda. Marhainska por a experencia di cerca e retonan cu su ruman y amigonan a enfreta y tabata convenci cu e kier contribui na un miho preparacion pa e futuro studiantenan di nos islanan. Den su buki Marhainska ta duna informacion y ta comparti experencia y conseho riba entre otro e idioma y cultura Hulandes, maneho di placa, heimwee y diferente otro topico. E buki ta inclui storianan real di studiante y ex-studiante y ta contene algun checklists pa facilita e preparacion y e experencia di e studiante na Hulanda. 

 

Durante e encuentro na Arubahuis a repasa e contenido di e buki y a intercambia di pensamento riba diferente aspecto. Arubahuis y e escritora a palabra cu hunto lo sigui delibera riba e posibilidad pa brinda e contenido di e buki na nos (futuro) studiantenan den forma di workshops y riba diferente otro manera pa haci e buki y e informacion mas accesibel pa e studiantenan di Aruba. Minister Besaril a felicita Marhainska cu su publicacion y a mustra elogio y aprecio pa su motivacion y compromiso pa informa futuro studiantenan pa medio di su buki. E mandatario a indica cu e ta considera e buki un bon contribucion na nos meta comun, esta pa nos hobennan ta miho prepara pa nan bida como studiante na Hulanda y pa nan ta exitoso. E buki di Marhainska Sakoetoe ta disponibel na Biblioteca Nacional di Aruba y na diferente boekhandel na nos islanan. Pa mas informacion por bishita e pagina “Studia na Hulanda” di Arubahuis conhuntamente cu Departamento di Enseñansa [www.ea.aw/pages/studia-na-hulanda] na e seccion di “overige informatiebronnen”. 

 

 

Nota pa redaccion: potretnan ta cortesia di Cas di Aruba