Home » ‘Cu Jorien Wuite den Tweede Kamer, nos tin un aliado den politica Hulandes’

‘Cu Jorien Wuite den Tweede Kamer, nos tin un aliado den politica Hulandes’

by Admin
0 comment 64 views

 

 

Den Haag  – Minister Plenipotenciario Guillfred Besaril kier a elabora un rato riba e aspecto politico na Hulanda cu tambe ta interesante pa Aruba. Ta pa e motibo ey cu minister Besaril den nomber di Gobierno di Aruba y muy en especial di e tres Kabinetnan na Hulanda, esta e casnan di e Ministernan Plenipotenciario di Curaçao, St. Maarten y Aruba ta felicita sra. Jorien Wuite como miembro di parlamento di Hulanda, esta Tweede Kamer. Sra. Wuite tabata Minister Plenipotenciario di St. Maarten y ultimo ela forma parti di e partido D66 y a bai eleccion pa parlamentario di Hulanda y exitosamente ela logra drenta parlamento di Hulanda. ‘Pero no solamente cu ela drenta parlamento di Hulanda pero algo ya hopi importante cu a sosode pa nos islanan ta cu ya fraccion di D66 a apunte como e persona encarga cu e cartera Relacionnan di Reino den Tweede Kamer. Pues nos tin un hende cu berdaderamente tin conocimento di kico ta un persona Caribense; kico ta e islanan. Un hende cu nos a sinta hopi cune den diferente reunion como Minister Plenipotenciario. Esaki ta hopi importante pasobra sra. Wuite conoce e casnan, e situacionnan, e conoce e indole di e negosacionnan pa loke ta e entidadnan nobo, pues nos tin un entrada cerca un persona cu nos bo por bisa ta un hende di nos.’

 

Minister Besaril a sigi bisa cu ta bunita pa mira cu despues cu sra. Wuite a manifesta su mes como Minister Plenipotenciario na Hulanda y cu awe ela logra drenta den Tweede Kamer. Minister Besaril: ‘Nos por bisa cu nos tin un aliado, un persona cu por lo menos sa mas di e materia di e islanan den e parti Caribense di Reino. Un palabra di felicitacion pa sra. Wuite y mi ta desea su persona hopi exito y forza den tur loke ta bini. Mi ta kere cu na momento cu tin un formacion concreto di e proximo Gobierno Hulandes, e ora ey sra. Wuite lo tin un funcion fijo. Pero mi ta premira cu den cualkier tereno cu sra. Wuite termina, elo ta bai sea na cabes di e comision “Koninkrijksrelaties” of e lo tin tarea basta extensivo pa loke ta e materia di e relacionnan di Reino,’ segun Minister Plenipotenciario Guillfred Besaril.

 

Riba e potret e bishita di cortesia di Jorien Wuite como Minister Plenipotenciario cerca su colega di Aruba.

 

Nota pa redacion: E potret ta cortesia di Cas di Aruba

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio