Home » Corte Superior a condena capitan di boto haya cu 2253 kilo di cocaina na 8 aña di prison

Corte Superior a condena capitan di boto haya cu 2253 kilo di cocaina na 8 aña di prison

by Admin
0 comment 46 views

 

ORANJESTAD – Mientras cu Corte den Promer Instancia a condena e capitan H.H.C., na 10 aña di prison, Hof di Corte Superior a condena H.H.C. na 8 aña di prison.

Aruba Native por a compronde cu Hof a haya e exigencia di Procurador General di 12 aña di prison di mas.

Na Juli 2020, Corte di Husticia di Aruba a dicta sentencia caminda Hues a condena e capitan di e “tugboat” “Gracia”, e Venezolano H.H.C. na 10 aña di prison. H.H.C. a wordo haya culpable di a importa 2253 kilo di cocaina.

Ta asina cu Fiscal a exigi 12 aña di prison y Ministerio Publico a apela e sentencia. Durante tratamento di e caso den Corte Superior, Hof a mustra cu for di autoridad Colombiano, Guarda Costa di Aruba a wordo notifica cu tin un “tugboat” ta navegando cu un cargamento grandi di droga. Guarda Costa a warda ora cu e boto aki tabata den awa terirotiral di Aruba y a intercepta esaki.

Den un bodega di e boto a bin haya 53 bulto cu a pisa 2253 kilo di cocaina. E otro 4 miembronan di tripulacion, a wordo declara liber pasobra Hues di Corte den Promer Instancia ta haya cu no tin indicacion cu e 4 miembronan di tripulacion tabata sa cu tin droga abordo. A resulta cu e boto aki a sali for di Colombia cu destino Trinidad Tobaco.

Procurador General a bisa Hof cu e ta haya legalmente proba cu e capitan di “Garcia”, H.H.C., ta culpable di a transporta droga. Procurador General a exigi pa subi e castigo di 10 pa 12 aña di prison, mirando e gran cantidad di droga cu tabatin abordo di e boto.

Hof a bisa cu e ta haya legalmente proba cu H.H.C., intencionalmente a transporta e droga. Como capitan di e boto e ta responsabel. Mirando e gran cantidad di droga, esta 2253 kilo, Hof ta haya cu esaki tabata destina pa mercado internacional.

Hof ta haya cu pa cu e castigo, no solamente mester tene cuenta cu e cantidad di droga cu a keda confisca sino tambe kico tabata e funcion di e capitan. Hof a mustra cu for di henter e investigacion por conclui cu e capitan H.H.C. su funcion tabata unicamente transporta e droga. Hof ta haya cu no tin ningun indicacion cu H.H.C. tabata envolvi den e preparacion di transportacion di e droga. Teniendo esaki na cuenta, Hof ta haya e castigo exigi pa Procurador General di mas.

Hof a condena H.H.C. na 8 aña di prison, cu ta menos cu e 10 aña di prison cu Corte den Promer Instancia a condena H.H.C.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio