Durante un encuentro publico Parlamento a ricibi un update di gobierno y parti di Crisisteam. Aki a ricibi alaves kico Aruba por spera na desaroyo turistico den e lunanan nos dilanti. Naturalmente tur proyeccion ta keda depende di con pueblo ta actua y mantene su mes na protocol y reglanan pa disminui e contagio di Covid-19.
Situacion actual
Ta mustra cu e impacto di Covid riba e industria turistico a hiba Aruba bek te na aña 1989 tumando na cuenta e cantidad di bishitantenan. Aña 2020 a logra yega na un nivel di 37% di e cantidad di bishitantenan cu Aruba a ricibi na 2019, pues indicando un perdida di 63%. A pesar cu a compara e scenarionan di impacto di Covid cu otro crisisnan cu Aruba a experiencia den pasado manera 911 y Nathaly Halloway, Parlamentario Setty Christiaans-Yarzagaray tin e pensamento cu niun crisis di pasado ta comparabel cu e crisis causa pa Covid mirando su embargadura mundial.
Desde reapertura di frontera na juli 2020, e tendencia den crecemento tawata na un nivel mas abou cu a proyecta cu tawata grandemente causa door di casonan positivo di Covid registra unda Aruba a haya un code cu a marca Aruba como un destinacion di risico. Esaki tawatin su impacto en especial den luna di september di 2020. Rekistonan pa test prome cu yegada door di Aruba pero tambe despues protocolnan introduci door di otro paisnan manera Merca tambe a influencia pronosticonan den turismo.
Scenario di recuperacion
Resultadonan pa 2021 tawata premira originalmente basa riba proyeccion cautelosamente conservativo cu por hiba Aruba bek na resultadonan di aña 1991. Proyeccionnan ta indica di bira mas positivo cu a premira y resultadonan ta proyecta awor mas riba scenario optimista cu por hiba Aruba bek na resultadonan di aña 1996.
Luna di maart a experencia un adelanto na unda ATA a proyecta originalmente cu e luna lo cera cu 42 mil bishitante pero a logra surpasa loke a premira y a resulta di bira 45 mil. Mirando e tendencia aki y si e situacion di Covid sigui manehabel, a ahusta e proyeccion di luna di april mas halto cu anticipa na 49 mil bishitante. E mesun tendencia aki ta ser spera tambe den kwartaal 2 di 2021. Aki director di ATA a indica cu expectativanan a surpasa hasta e scenario optimista cu cautela manera originalmente premira pa lunanan di mei y juni.
Pa e expectativa di kwartaal 3 y 4 ta spera cu Aruba coopera y yuda mantene e casonan di Covid na un nivel manehabel. Comportacion di pueblo ta sumamente importante pa recuperacion di Turismo y nos Economia. Esaki ta importante tambe mirando cu e expectativa pa recuperacion den e luna aki ta hasta surpasa e nivel di resultado di e mesun luna di 2019 pa loke ta trata cantidad di asiento aereo. Indicando e confiansa den Aruba y e sentimento di seguridad cu probablemente ta door di medidanan tuma pero tambe vacunacion cu ta tumando lugar. Tur proyeccion di bishitante pa 2021 ta basa riba capacidad di asiento aereo y grado di ocupacion reflehando e demanda pa Aruba como destinacion.
Bishitante Crucero
Pa loke ta mundo Crucero, tambe a proyecta 3 diferente scenario. Aruba ta proyecta pa ta entre e promenan pa habri puerto bek pa bishitante crucero cu colaboracion di Celebrity Cruise Lines. E scenario conservativo di recuperacion ta basa riba 25% di resultadonan di 2019. Inicialmente ta premira un recuperacion gradual. Aruba lo bay ricibi un maximo di 1,200 pasahero cada pasa 2 siman. Esnan riba Crucero lo ta vacuna y lo tin rekisito pa test esnan bou 18 aña. Despues lo traha riba 2 otro opcion tambe cu ta Royal Caribbean y Norwegian sperando cu tambe lo cuminsa despues di memey di aña.