Home Politics Parlamentario Edgard Vrolijk: “Enfoke ta pa trece trankilidad, confiansa y...

Parlamentario Edgard Vrolijk: “Enfoke ta pa trece trankilidad, confiansa y mehoracion di calidad di enseñansa”

SHARE

 

 

Dia 25 di juni 2021 pueblo lo sali un biaha mas pa scoge su representantenan den Parlamento y alaves pueblo lo scoge su gobernantenan pa e siguiente 4 añanan. Un di e areanan di mas preocupacion ta enseñansa na Aruba. Desde 2017 pueblo a experencia hopi turbulencia, falta di consistencia y hopi dictadura cu a conduci na hopi demotivacion, duda y desconfiansa  cerca maestronan y cu no ta na beneficio di enseñansa cu ta e ader principal di un pais.

 

Trece confiansa y trankildad bek den enseñansa

Prome tarea di e siguiente Minister di Enseñansa ta pa trece confiansa y trankilidad bek den enseñansa. Den esaki e tin e tarea primordial di haci un revision total di tur cambio haci desde 2017 y cambionan pendiente cu ta proyecta pa ser implementa. Den e revision aki mester haci un evaluacion unda cambionan cu no tin claridad riba nan lo mester ser para y sigur cambionan cu a causa hopi consternacion mester ser revisa cu urgencia y haci cambionan necesario na esakinan. Tur esaki ta di vital importancia pa tin e cuerpo di docentenan den trankilidad p’asina hunto nos por cuminsa e proceso di mehoracion di enseñansa unda e maestronan lo bay hunga un rol importante den e exito di mehoracion di calidad di enseñansa na Aruba.

 

Desde 2017 tabatin mas problema cu cambionan den enseñansa

Desde 2017 enseñansa a conoce hopi turbulencia y cambionan proponi of implementa cu docentenan no ta involucra y no tabata na altura mes di e cambionan y mas pio ainda hopi di e cambionan sin e preparacion adecuado. Den e proceso nobo di cambio pa sigui eleva nivel di enseñensa lo haci uso di conocemento y experticio di nos mesun yiunan di tera (modelo IMSAN). Nos tin di kere den nos mesun hendenan cu nos como pais a inverti den nan preparacion y na e momentonan aki ta consciente cu mester bin cambio. Den tur area di enseñansa tin su reto pero sigur e necesidad di cambio. Tin necesidad di cambio cu ta core di curiculo (21st century skills), implementacion di SAM, upgrading y cuido di maestronan, innovacion, om-, her – en bijscholing, test di mucha, inclusion, implementacion di Sustainable Development Goals den enseñansa, acreditacion y asina por sigui menciona cambionan necesario. Pa por logra yega na e cambionan necesario y asina sigui eleva nos enseñansa maestronan lo hunga un rol hopi importante contrario na e maneho anterior y unda cu hunto den dialogo, dunando e respet na nos mesun hendenan y nan conocemento y experticio, mi tin sigur cu hopi cambionan positivo pa enseñansa den un proximo gobernacion lo ser logra.

 

Di aki mi ta haci un invitacion cu na momento cu nos partido presenta e programa oficial pa eleccion 2021, mi persona lo tene seccionnan interactivo unda tur hende den enseñansa por trece nan puntonan dilanti y unda hunto nos ta cuminsa caba e prome parti di e plataforma di comunicacion y dialogo cu lo bay ta e exito pa sigui eleva nos nivel di enseñansa na Aruba. 

Y sigur ta di vital importancia y a base di experencia amargo di e ultimo 4 añanan den enseñansa pa cada ken haci e mihor escogencia posibel y unda e escogencia no mester ta basa riba mal uso di e momento vulnerable cu enseñansa ta den y ni a base di populismo. A yega ora di trece  trankilidad, confiansa bek y hunto nos ta sigui eleva nivel di enseñansa na Aruba.