E proyecto di mantencion di edificio di corte situa den John G. Emanstraat a yega su final. A tene un ceremonia cortico den forma di firmamento di un proces-verbaal, caminda cu a entrega e edificio.

Awo e siguiente paso ta pa sigui cu e trabounan di mantencion, awo cu e edificio mes ta drecha. 

E proyecto aki tabata exitoso no solamente pa e mantencion, sino e manera cu e trabaonan a tuma luga, di tal indole cu durante di e mantencion por a efectua trabaonan den corte, mientras cu e edificio tabata kedando cla. A haya cooperacion di parti di e contratista. 

Minister di Husticia, Siguridad y Integracion, mr. Andin Bikker tin gran aprecio pa e trabou duro cu a tuma luga riba e edificio awo den tempo di crisis, cu nan no mester a huur un edificio adicional mientras cu e renobacion/mantencion a tuma luga. 

Siendo un persona cu a traha hopi aña como abogado renombra riba nos isla, e edificio di Corte di Husticia ta masha cerca di su curason. E no a basila ningun momento despues di realisa cu for di aña 2013 cu a entrega e edificio, no a percura pa mantencion di dicho edificio, cu pa colmo ta historico tambe. Despues di 8 aña awo e edificio ta den su gloria bek! 

Personal di Corte di Prome Instancia ta sumamente contento y satisfecho cu e edificio y ta gradici e contratista cu a haci un tremendo trabou. “Nos lo zorg como pais Aruba pa sigui esaki”, e mandatario a bisa. 

Tambe a inform’e cu e edificio aki tin un garantia te 2027. E ta gradici na tur cu a yuda realisa e proyecto aki, specialmente na Monumentenzorg cu a hunga un rol crucial den e trabounan aki.