Home Local International Day for Monuments and Sites (Icomos) ‘Complex Pasts, Diverse Futures’

International Day for Monuments and Sites (Icomos) ‘Complex Pasts, Diverse Futures’

SHARE

Tur aña Stichting Monumentenfonds Aruba (SMFA) ta celebra e ‘International Day for Monuments and Sites’ dia 18 di april. Door di e crisis no por celebr’e manera nos ta custumbra, pero toch nos kier a para keto na e dia aki. E aña aki tambe nos ta celebra e 25 aña di existencia di Stichting Monumentenfonds Aruba (SMFA).

International Day for Monuments and Sites.

Cu e idea pa celebra partimonio cultural rond mundo, UNESCO a establece 18 di april manera e ‘International Day for Monuments and Sites’ na 1983. E obhetivo di e celebracion aki ta pa sensibilisa e publico tocante e diversidad y vulnerabilidad de monumentonan y sitionan patrimonial construi rond mundo y e esfuerzo cu mester pa proteha y conservanan. Tur aña ICOMOS ta scohe un tema nobo a base di cual diferente paisnan ta trece conscientisacion tocante e importancia di nos monumentonan como parti esencial di nos patrimonio cultural. E tema di e aña aki ta ‘Complex pasts, Diverse Futures’.

Complex Pasts
E tema di e aña aki sigur ta un tema bon conoci pa Aruba;. E historia di nos isla ta compleho y ta consisti di varios fasenan. A haya influencia di hopi otro cultura di rond mundo. E resultado di e historia compleho aki ta un variacion grandi di culturanan cu hunto ta forma e mix cu nos ta yama ‘Arubiano’. Historia a laga varios rastronan visibel den nos herencia cultural. Di restonan di habitantenan Amerindio (arkeologia) te cu casnan di Lago na Colony (America di Norte), casnan y tiendanan di añanan ’30 na Playa (Colombia), dakpan (Hulanda), varios ‘club’ na San Nicolas, herencia industrial (tanki di awa Kibaima, goldmills) etc. (foto’s)

Den e ultimo 25 aña SMFA a desaroya un vision mas amplio. E prome añanan nos a enfoca hopi riba monumentonan grandi y cu cierto status, principalmente na Playa. Restauracion di cas di dokter Arends, cu a bira Stadhuis y Censo por ehempel. Despues nos a enfoca mas y mas riba e storianan tras di e monumentonan y tambe nos a enfoca mas riba e casnan ‘van de gewone man’ cu tambe a hunga un rol importante den e desaroyo di nos pais y cultura. Nos a investiga full e storia tras di Uncle Louis Store y nos a cumpra Cas Tan Tin cu a bira museo. Asina, poco poco, nos por duna un mihor bista riba e bida diario di antes. Awendia SMFA ta doño di un coleccion grandi di monumentonan rond di Aruba den tur forma y tamaño.

Diverse futures
Stichting Monumentenfonds Aruba lo keda duna mas y mas atencion na nos herencia multicultural. E conexion entre nos herencia tangible (monumentonan) y intangibel (storianan, pero tambe musica, arte, cuminda) ta keda hopi importante. Pa e motibo aki tambe nos Fundacion ta pone atencion na educacion y conscientisacion tocante nos Aruba su monumentonan. Esaki nunca nos por logra sin e bon cooperacion di un cantidad grandi di partnernan. Nos kier a gradici tur nos partnernan sperando cu nos lo por sigui traha huntu riba diferente proyectonan. Monumentenfonds semper ta busca informacion tocante nos herencia, sea ta portretnan di antes, storianan of artefactonan. Un y tur cu tin informacion por tuma contacto libremente cu SMFA via info@monumentenfondsaruba.com, nos Facebook page Stichting Monumentenfonds Aruba of Instagram @monumentsfundaruba.

Ora nos ta consciente di nos historia nos ta siña y por a aprecia locual cu nos tin awo y prepara bon pa futuro.

‘Monumentenfonds, preservando historia pa futuro’

Skirbi pa: Anne Witsenburg, directeur