Home Local Ban yuda salba baby Ronin

Ban yuda salba baby Ronin

SHARE

Baby Ronin tin necesidad urgent di ayudo. Instancianan di Aruba no kier coopera mas cu su tratamento medico, cu ta uno compleho. Pero su mayornan no ta entrega y ta pidi ayudo.

Ronin ta seis luna  bieu, y ta yiu di Gabrielle (Gaby) y Jermean.

Ronin a nace tres siman prematuro y tur cos tabata mustra bon cu ne, treciendo hopi alegria no solamente pa su mayornan pero tambe pa resto di famia.

Algun ora despues di su nacemento, e alegria a bira un tristeza. A constata cu Ronin a nace cu un defecto serio na su curason pa cual mester di un operacion urgente pa salb’e.

Dos dia despues a transporte cu Air Ambulance pa un facilidad cardiovascular na Colombia, ya cu Aruba no tin e facilidadnan y tampoco e dokternan pa yud’e.

Su mama a logra biaha cu Ronin pa Colombia, pero na su yegada a inform’e cu e no por keda cu e baby. E mester a lucha y yora hopi pa por a permitie mira su baby. Aunke ta algun ora so. Despues di hopi yoramento, a permitie keda cu e baby.

Despues di varios siman y luna di test y transfusionnan, a bin descubri cu e tin un fayo den su Bone Marrow. E parti aki ta responsabel pa e produccion di sanger cora cu ta transporta oxigeno pa resto di e curpa, y sanger blanco cu ta lucha contra infeccionnan y “platelets” cu ta responsabel pa coagulo di sanger.

E tin un fayo completo pues, cu ta nifica cu e ta den un riesgo constante di sangramento y infeccion severo cu ta peligro pa su bida. “Baby Ronin mester di un transplante di bone marrow hopi rapido, sino e ta perde e lucha y fayece,” familiarnan ta bisa.  

E mester di e transplante aki prome cu nan por opera su curason. “Oloshi ta sigui core y no tin mucho tempo mas.”

Gabym Jermean y Ronin ta haya sla tras di sla. Na Aruba no tin forma pa trata baby Ronin y diferente hospital internacional ta nenga mas tratamento considerando e combinacion di problema compleho cu e tin. E hospital- y dokternan ta basa nan conclusion di loke nan ta lesa riba papel, sin evalua Ronin personalmente.

“Ronin a lucha te awo y e merece e chens di lucha pa su bida.”

E mayornan a logra haya un hospital na Merca cu suficiente experticio y dispuesto pa tuma e caso compleho y mester transporte cu Air Ambulance mas lihe posibel. “Nos mester di boso ayudo pa duna baby Ronin e chens di sigui lucha. Sobrevivencia no ta garantisa. Tempo ta esencial. Nan seguro ta nenga pa cubri mas tratamento y ta urgiendo y hasta presiona nan pa bolbe cas y lague fayece. Pero e ta un baby feliz, cu un sonrisa cu ta gana curason di tur hende cu mir’e. Yuda nos yuda Ronin biba.”

Aki bou tin un link unda cu por bay riba e pagina y haci un donacion pa Ronin por bay Merca.