Home » Parlamentario Setty Christiaans-Yarzagaray: “Ta di aprecia cu un bes mas den 2021 Gobierno a prepara pa brinda asistencia di FASE, MKB y subsideo di salario”

Parlamentario Setty Christiaans-Yarzagaray: “Ta di aprecia cu un bes mas den 2021 Gobierno a prepara pa brinda asistencia di FASE, MKB y subsideo di salario”

by Admin
0 comment 38 views

 

 

Parlamento a ricibi e concepto di ley di presupuesto 2021 di pais Aruba dia 31 di maart ultimo. Den reunion di comision central a dicidi cu Parlamento tin te cu dia 20 di april pa haci pregunta oficial na Gobierno. Despues di e ronda di pregunta aki logicamente ainda Parlamento tin e oportunidad pa haci pregunta durante tratamento di presupuesto. E panorama financiero den e concepto di ley aki ta acapara entradanan, gastonan, e necesidad financiero y e parti di kapital. Den e documentonan ta presenta alabes e cantidad di placa necesario pa sigui duna sosten na aspectonan social laboral a consecuencia di efecto di e pandemia di Covid.-19.

 

Loke ta premira na entrada y gasto

Por nota cu Gobierno ta premira un entrada di 1,038 miyon florin den caha di gobierno pa 2021. Esaki ta 34 miyon mas cu 2020 pero ta refleha un caida compara cu aña normal sin Covid di algo mas cu 500 miyon florin. E caida den entradanan ta di ambos impuesto directo y impuesto indirecto.

Gastonan ta proyecta na 1,916 miyon florin pa aña 2021. Esaki ta refleha un bahada den gasto di 202 miyon florin compara cu 2019. No mas compara cu un aña normal sin Covid gastonan ta cerca di 500 miyon adicional. Gastonan fiho di gobierno no por wordo reduci asina facil manera gastonan di interes, servicio y producto y personal. Por nota si cu den gasto di personal tin un bahada di 11 miyon florin compara cu 2020. Den un aña normal sin Covid gasto di personal tawata rond di 480 miyon florin y pa 2021 esaki ta proyecta na 431 miyon florin. E reduccion aki ta danki na e acto di solidarismo di parti di empeadonan publico pero tambe basa riba e maneho proyecta di reduccion di gastonan di personal manera entre otro VUT regeling.

 

Proyeccion di gastonan na sosten social laboral 

Gobierno despues di haci estudio di impacto mesora despues di entrada di e pandema di Covid, a tuma decision di sostene esnan cu lo bay perde trabou of entrada door di efecto di perdida di Turismo, consecuentemente su efecto economico, door di Covid.

E sosten cu concepto di ley ta presenta ta pa FASE 42 miyon florin, 40 miyon na MKB y 280 miyon na Subsidio di Salario. Pues un total di 362 miyon florin pa aña 2021. E total cu a wordo paga na esakinan den 2020 tawata 338 miyon, pues pa e periodo desde luna di april/mei te cu fin di 2020.

 

Ta di aprecia y gradici cu un bes mas den 2021 Gobierno a prepara pa brinda asistencia di FASE, asistencia na MKB y subsideo di salario a pesar di e retonan grandi ainda nos dilanti. Mester remarca cu e biaha aki atrobe Parlamento a ricibi un concepto di ley di presupuesto den un bachi mas innovativo y eficiente pa analisa. Esaki ta esfuerso di Departamento di Finansas den e ultimo añanan cu ta purbando di enbes di un documento basta extenso, purba presenta mas eficiente y alcaso. Parlamento semper tin e oportunidad pa haci pregunta unda lo por ricibi informacion mas detaya riba peticion si ta necesario.

Parlamentario Setty Christiaans-Yarzagaray ta termina invitando tur cu tin interes pa tira bista den e concepto di presupuesto 2021 di pais Aruba nota of si ta desea di aporta cu pregunta di presupuesto 2021 esaki ta obtenibel riba Facebook page di Fraccion di MEP. 

 

             

 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio