Home » Fiscal a baha pisa riba cabezante di bendemento di droga den Madiki

Fiscal a baha pisa riba cabezante di bendemento di droga den Madiki

by Admin
0 comment 67 views

ORANJESTAD – Awe mainta Fiscal a baha pisa riba e sospechoso C.B. kende e ta considera e cabezante. El a exigi 6 aña di prison y cu tur loke a confisca na e cas lo keda confisca. Aruba Native por a compronde cu 5 sospechoso, entre nan un dama, a presenta den sala di Corte di Husticia pa un caso grandi di droga. Ta trata aki di e homber O.T., e Venezolano biba na Aruba J.M.G., e homber di Curacao biba na Aruba C.B., e dama Hulandes biba na Aruba A.v.d.P., y e homber B.F. Ta asina cu A.v.d.P. su caso a wordo posponi door cu su abogado a bira malo. Hues a pospone e caso pa dia 20 Mei 2021.

Hues a mustra cu e investigacion a cuminsa 26 Augustus 2020 ora cu servicio di intelegencia a haya informacion cu C.B. y A.v.d.P. ta bendiendo droga na un cas na Madiki. Unidad special di narcotica a bay den Canoastraat pa vigila movecionnan diferente dianan na October 2021.    

Dia 28 October 2020 Polis a haya autorizacion di Fiscal y Hues Comisario pa haci investigacion na e cas. Nan a bay vigila y detene varios persona cu a cumpra. Nan a bay na e cas y detene A.v.d.P. pafor mientras cu C.B. a core bay pero despues a keda deteni. A haci investigacion den e cas y a haya diferente droga, atributonan di droga, placa. Den bahul di un auto a haya saco cu placa, 599 gram marihuana, 106 gram di cocaina, 620 dollar y mas cu 10 mil florin. Den dos meya a haya dos revolver. Un di nan tabatin 5 bala aden. A confisca un motocicleta, un balansa, den e tas den bahul di auto a haya buki cu cantidad di nomber di hendenan. Tabatin administracion ki tipo di droga tabata bende. Tin di e nombernan ta conoci pa Polis como hendenan meti den droga. Den un tas bao dak, a haya 36,6 gram di marihuana, 91 pilder XTC, 84 gram di cocaina, 6 gram di heroina. Den cas a haya 98 pilder di XTC, 106,3 gram di cocaina, 193 gram di hash. E hash a resulta canabisoil. Hues a splica cu tin un decreto ministerial cu por tin un cierto cantidad. Polis tambe a haya mas di 700 cabez di mata di marihuana. Den un otro tas a haya 1096,9 gram di cocaina. 

Despues Polis a para un auto despues di un buskeda y a haya ariba e asiento na banda di e chofer, 4 saco di marihuana cu 9,8 gram, 21 saco chikito cu 24,2 gram di cocaina, 8 saco di piedra moli. E chofer J.M.G. a wordo deteni. Den asbak di e auto a haya 232,50 florin cual a keda confisca. Tambe a haya un buki cu diferente nombernan aden. Segun J.M.G. ta nomber di cosnan cu e tin cu haci.

E homber O.T. deteni na December 2020 na cas di C.B. E dama A.v.d.P. a bisa Polis cu O.T. tabata entrega droga na clientenan di A.v.d.P. Tambe a haya chat di A.v.d.P. cu ta bisa O.T. cu ta fin di luna y cu tin yen di entrega pa haci. O.T. a declara cu e marihuana cu e ta usa e ta haya di B.F. na  Boroncana. O.T. a mustra e cas y Polis conoce B.F. cu ta un conoci di Polis. Doño di e cas a bisa cu el a huur e apartamento na B.F. Polis a haci investigacion den e apartamento y a haya placa y cocaina den un cartera. Den un otro cartera a haya mas placa. A haya 103,4 gram di marihuana, 92,7 gram di cocaina. Segun B.F., e marihuana el a haya regalo pasobra el a haci aña y e cocaina el a haya como pago pa trabao cu el a haci.

   Fiscal a bisa cu e ta haya legalmente proba e bendemento di droga. Fiscal ta considera C.B. e cabezante y a exigi 6 aña di prison pa C.B.

   Pa loke ta B.F., Fiscal a bisa cu e no ta kere cu a haya droga pa su aña. Exigi 18 luna di prison.

   Pa loke ta O.T., Fiscal a exigi 18 luna di prison di cual 9 luna ta condicional y 2 aña di prueba.

   Pa loke ta J.M.G., Fiscal a bisa cu e ta tene cuenta cu J.M.G. ta un residivista. El a exigi 18 luna di prison y impone e castigo condicional cu tabata pendiente.

   Fiscal tambe a exigi pa confisca tur loke a keda confisca especialmente na cas di C.B.   Hues awor ta bay studia e caso pa dentro di algun siman dicta sentencia.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio