Home » Minister Xiomara Maduro hunto cu Crisisteam a reuni cu gremio comercial A scohe pa reduci mobilidad pa evita lockdown di comercio

Minister Xiomara Maduro hunto cu Crisisteam a reuni cu gremio comercial A scohe pa reduci mobilidad pa evita lockdown di comercio

by Admin
0 comment 61 views

ORANJESTAD – E anuncio di ciere di negoshi durante e dianan di fiesta di Pasco Grandi a causa basta critica den comercio y comunidad en general. Pa e motibo aki e siman aki Minister Maduro di Economia hunto cu Crisisteam a reuni cu gremio comercial pa asina scucha e preocupacion cu ta reina riba e decisionnan di crisis cu ta afecta comercio. Alabes Crisisteam a haya e oportunidad pa brinda un splicacion na gremio comercial con ta yega na e decisionnan ora di un crisis di e mangnitud di COVID19.

 

Crisisteam a duna un bista di e factornan cu ta influencia e decisionnan

Durante e reunion Crisisteam a duna un bista amplio di kico ta e factornan cu ta hiba na toma di decision ora di crisis manera esun cu e pandemia di COVID19 ta trece cune. Ta tene cuenta cu varios factor cu ta regarda salud, comercio, social, orden publico, infrastructura, companianan vital y tambe enseñansa. Banda di esaki mester tene na cuenta tambe e reglanan stipula den Reino Hulandes y di e organisacionnan internacional riba e tereno di salud publico. E ultimo aki ta importante ya cu Aruba ta depende di turismo. Mas concreto mester tene cuenta cu factornan manera, entre otro, e cantidad di casonan activo y casonan nobo di COVID19, e capacidad di hospital y e capacidad di nos airport.

 

A scohe pa reduci mobilidad pa evita lockdown di negoshi

E ta importante pa remarca cu rond di nos Pais y tambe na Europa, hopi Pais a scoge pa lockdown gran parti di nan comercio. Na Aruba no a opta pa esaki pa no causa mas daño na economia di nos Pais. Crisisteam a scoge pa medidanan pa reduci mobilidad, movecion di hende y di e manera aki percura pa comercio por a keda habri desde juli 2020 cu a habri bek despues di un lockdown di nos Pais. 

 

Ta tuma decision bon balansa y no ‘ad hoc’

E percepcion kizas ta cu e toma di decision pa sera negoshi ta ‘ad hoc,’ pero no mester perde for di bista cu den un situacion di crisis ta tur dia mester haci e evaluacionnan necesario pa evita mas crisis y pa salba bida di hende. Minister Maduro a splica cu e ta den constante contacto cu Minister President cu ta na cabes di e Crisisteam y ta percura pa ora ta toca comercio pa duna e feedback necesario y tambe trece e preocupacionnan dilanti pa asina e Crisisteam por tene cuenta cu nan ora di tuma decision. Den e Crisisteam mes tin cluster 8 cu ta regarda economia, cu ta percura semper pa trece un balansa den e decisionnan. Finalmente Minister Maduro ta subraya cu e situacion di crisis ta uno dificil pa tur hende, pero cu comercio por ta trankilo cu tin un team grandi di profesional di Aruba cu ta traha cu duro pa nos Pais por surpasa e crisis sin precedencia aki. Minister Xiomara Maduro ta gradici Crisisteam pa e gran trabou aki.

 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio