Home Politics Prome Minister a reuni cu sindicatonnan: A TRATA POSIBEL CAMBIO DEN...

Prome Minister a reuni cu sindicatonnan: A TRATA POSIBEL CAMBIO DEN PROCESO DI CORTAMENTO DI SALARIO DI EMPLEADONAN PUBLICO

SHARE

Diaranson 14 di april Gobierno a reuni cu sindicatonan SADA, SIMAR, SEPPA, SPA y TOPA. A trata diferente tema cu ta relaciona cu e posicion di e empleado publico.

Prome Minister Evelyn Wever-Croes a indica cu un tema importante cu a wordo trata ta tocante e cortamento di salario. Ya ta un aña pasa cu Gobierno a haci apelacion na tur empleado publico pa entrega 12.6% di nan salario pa cubri e placa di Fase pa yuda esnan cu a perde entrada door di e pandemia. E peticion aki na dado momento a bira un condicion duro di Hulanda (harde voorwaarde) pa Aruba por a haya e sosten di likides.

Actualmente ainda tin Fase, pero ta trahando riba otro proyectonan pa si Fase yega na caba, tin algo otro pa acapara tur esnan cu a perde nan entrada debi na e Pandemia. Sinembargo actualmente e cortamento di salario ta algo cu tin cu continua pasobra e ta un di e condicionnan stipula door di Hulanda pa por haya sosten di likides, Prome Minister a enfatisa.
A pesar di esaki, na e momentonan aki conhuntamente cu sindicatonan ta mirando e posibilidad di por cambia e cortamentonan di salario.

Manera ta conoci aworaki e empleado publico ta entrega tur luna 5% di su salario, y e sobra 7,6% ta wordo kita di e vakantie uitkering y/of premie cu e ta haya fin di aña. Actualmente ta sondeando e posibilidad pa aplica loke cu Corsou a aplica, mirando cu Hulanda a aproba esaki. E ta encera cu e empleado publico no ta corta 5% mas, e porcentahe aki ta bira menos y e resto ta wordo compensa cu Vakantie uitkering, premie y ATV-dagen. Esey ta pone cu e empleado publico por bay cas cu mas placa netto den su man pa luna.

Prome Minister a duna di conoce cu sindicatonan ta receptivo pa e idea aki y ta agradecido cu ta trahando riba e tema. E siguiente paso ta cu lo reuni na nivel tecnico caminda profesionalnan lo presenta diferente scenario pa asina hunto por yega na un decision.

Pa conclui, Premier Wever – Croes a gradici sindicatonan y miembronan di sindicatonan cu ta e empleadonan publico, pa e solidaridad cu a demostra desde aña pasa.

Prome Minister ta satisfecho cu e reunion a bay den bon ambiente cu hopi comprension di un pa otro, cual ta un muestra hopi bunita di kier yuda y cu ta stima nos Pais Aruba. E reunion lo sigui den e siguiente dianan.