Recientemente a sali un video riba red social, den cual atrobe un homber ta acusa Minister di Husticia di ta strob’e di bin Aruba pa dera su yiu. Lamentablemente, mescos cu el a haci algun tempo atras, ta sali ataca e mandatario sin ningun base of motibo. Locual e ta bisa simplemente no ta berdad.
T’asina cu un periodista a comunica cu Bureau di Ministerio di Husticia pa pidi informacion pa e persona por biaha pa e bay entiero di su yui.
A informa e periodista cu ta un situacion comprendibel y a splica e procedura bou leynan vigente di Aruba tur persona cu a yega di wordo deporta recientemente y tin nacionalidad cu ta rekeri Visa, tin pa: a. pidi pa recorta e periodo di no adimicion, ja cu ora wordo deporta ta haya un periodo den cual no ta admisibel na Aruba y/of b. pidi visa via Embahada Hulandes, ya cu aparentemente e persona tin un nacionalidad cu ta rekeri visa a base di Rijksvisumwet. Ademas e reglanan di Covid (ED-card) ta vigente.
E realidad ta esaki: Ora deporta un stranhero indocumenta di Aruba, e ta haya prohibicion di reentrada di algun aña. Den e caso specifico aki, e homber lo ta bonbini na nos isla te dia 23 di mei 2024. Locual e maneho ta rekeri ta, cu mester pidi dispensacion di e prohibicion pa por bolbe bin Aruba. Pues e dispensacion no tin nada di haber cu pidi despensa pa e acusacionnan sin base cu el a expresa contra e minister y contra e gobierno completo.
Comosifuera poco, a tuma contacto cu Consulado General di Reino Hulandes na Republica Dominicana, pa nan papia cu e persona aki y intermedia den locual e mester por por asisti na entiero di su yiu na Aruba.
“Pues mi no tin nada personal contra e persona, mi ni conoce, el a wordo deporta door di Guarda Nos Costa den cuadro di trabow di e Departamento. Desde e tempo ey cada bes e ta purba mancha mi bon nomber cu acusacionnan fofo y sin base”, asina Minister Andin Bikker a indica.
———