Home Local Hospital orguyoso di tin hende cu por conta riba dje Kay-Linda Dedier...

Hospital orguyoso di tin hende cu por conta riba dje Kay-Linda Dedier ta empleado di luna di maart

SHARE

ORANJESTAD, Aruba: Tur luna Dr. Horacio E. Oduber Hospital ta saca su empleado di luna dunando asina reconocemento na esnan cu ta sobresali. Den un ambiente di sorpresa a duna di conoce cu Kay-Linda Dedier t’e empleado di luna di maart. Ela wordo nomina door di ful e team di finanzas cu bunita palabranan describiendo tur motibo pakico e merece di haya e bunita titulo aki.

Kay-Linda ta manager Financiële Administratie y e tin mas cu diescuater aña trahando den Hospital cu un super bon team. Semper e ta bisa cu hunto ta hacie y e tin respet p’e team y vice versa. Administracion ta encera tur cos pa loke ta finanzas; nan ta percura pa pagonan di vendors, payroll y tambe traha diferente raport. Semper tin algo cu ta pasa of algo nobo ta drenta. E departamento tin su retonan pero como nan ta un team hopi uni, e team ta hacie hunto. “Esey ta e parti cu mas mi ta gusta di mi trabou”, el a duna di conoce. Tur dia tin algo nobo pa siña.

Nancy Laclé, lider di team di accounts payable, a duna di conoce cu Kay-Linda a drenta casi mesun temporada cu ne y e no tin palabra cu por describe con bon nan comunicacion ta. E sosten cu ta haya di dje y e por yega cerca dje cu cualkier pregunta. Tambe Kay-Linda ta un persona cu ta brinda e forma pa otro desaroya nan habilidad. “Bo ta haya chens di “zoek het uit” y pa bo mes bay padilanti den bo cosnan.” Semper Kay-Linda ta eynan pa duna sosten y apoyo.

Lilian Bislick a duna di conoce cu pa su persona y tambe otro colega Kay-Linda ta nifica hopi. Esaki ta paso cu e ta pusha nan tur dia pa saca lo miho. E ta un persona cu hopi comprension. E departamento ta consisti di 98% di hende muhe y tur tin nan caracter. Lilian ta conta cu aunke tin biaha nan ta fastioso, toch e sa di compronde nan. Kay-Linda ta yuda su coleganan den tanto trabou como personal. Masha pabien Kay-Linda cu e bunita reconocemento aki!