Aruba a ricibi awe tardi un ‘batch’ grandi di vacuna atrobe.

ORANJESTAD, 14 april 2021. Un ‘batch’ di 30.420 dosis di e vacuna Pfizer a yega Aruba awe tardi riba vuelo di KLM.
Manera nos Minister di Turismo, Salud Publico y Deporte a informa algun dia pasa. Hulanda a compromete cu Aruba lo sigui ricibi e vacuna di Pfizer y mirando e peticion grandi di comunidad pa vacuna, Hulanda a manda un ‘batch’ dobel mas grandi, pa asina por continua cu e ehecucion di nos Plan Nacional di Vacunacion contra COVID-19.
Mas lihe Aruba vacuna su comunidad ente 75% cu 85% mas lihe Aruba por cuminsa sondia posibilidadnan pa flexibilisa medidanan existente. Mas lihe nos poblacion vacuna, mas lihe nos ta recupera. Nos ta ariba bon caminda pa crea e inmunidad colectivo desea.
Awo cu Aruba tin un cantidad grandi di vacuna, ta invita comunidad henter cu no a registra ainda pa haci esaki mas pronto posibel pa nos tur por ta vacuna y proteha.
Aruba ban sigui registra y ban sigui vacuna, asina nos logra e recuperacion tan anhela!