Home Corte 18 luna di prison pa homber cu a saca pistool ora deal...

18 luna di prison pa homber cu a saca pistool ora deal di droga a bay robez

SHARE

ORANJESTAD – Hues di Corte den Promer Instancia a condena e homber S.D. pa tabatin un arma di candela carga riba un stacionamento di auto na un restaurant.

Aruba Native por a compronde cu Polis a yega eynan pa un pelea y a mira con S.D. tabata sacando e pistol for di un tas cu e tabatin na su banda.

Di biaha a surgi un persecusion na pia, mientras cu esnan den e otro a baha na awa. A logra detene S.D. y a haya e pistool benta bao di un auto. S.D. ta para riba cu e arma no ta di dje.

Hues a bisa cu dia 9 October 2020, S.D. tabatin un pistool Baretta 9 mm cu 11 bala y un di e balanan tabata den e loop cla pa tira. Fiscal a bisa cu e amiga di S.D., K. a bisa cu e tabata maneha e auto y S.D. tabatin e tas chikito cun’e. Fiscal a bisa cu arma di candela ta causa hopi desastre. Danki Dios cu no tabatin tiramento. Fiscal ta considera S.D. un residivista ya cu den pasado caba el a wordo condena pa algo mesun cos. El a exigi 24 luna di prison pa S.D.

Durante tratamento di e caso S.D. a bisa cu e tabata den e otro auto y a surgi un pelea pa un deal di marihuana cu a bay robez. Aparentemente S.D. no tabatin suficiente placa pa cumpra e lote. Den e auto tabatin hombernan di habla Spaño. Segun S.D., un di nan a pone pistol riba dje. El a dal’e na su man y e pistol a cay. El a coy e arma y pa evita lo peor el a hinca e arma den tas. S.D. a admiti cu durante e persecusion di Polis na pia su tras, el a tira e pistol bao di un auto. Door di esey S.D. ta haya cu e no tabatin poder riba e arma pasobra e arma no ta di dje.

Hues a bisa cu e ta kere declaracion di e agentenan di Polis y no manera S.D. a bisa. No tin motibo pa duda den declaracion di Polis.

Hues a bisa cu a keda legalmente proba cu S.D. tabatin riba 9 October 2020 un arma di candela carga den su poder. Pa cu e castigo, Hues a bisa cu e ta tene cuenta cu S.D. tabata cana cu arma riba caminda publico ta un delito hopi serio. E ta tuma S.D. na malo pa esaki. Tambe Hues a mustra cu anterior S.D. a yega di wordo condena pa un delito igual. Reclasering ta conseha pone S.D. bou supervision. Hues a condena S.D. na 24 luna di prison di cual 6 luna ta condicional. Cu e condicion special cu S.D. ta cay bou guia di Reclasering durante e 2 aña di prueba.