Diamars mainta lider di POR, Alan Howell tabatin un conferencia di prensa dilanti Insituto Medico San Nicolas, cual awo a bira tambe hospital.
El a bisa cu despues di tanto aña, awo por bisa cu San Nicolas tin su hospital bek. “Nos tin un gran satisfaccion di por mira cu Dr. Rajnherc, como director, hunto cu tur su staff y profesionalnan con duro nan a traha pa asina IMSAN port a riba un standard internacional. E servicio profesional cu nan ta brinda semper a bin dilanti den e feedback di e pashentnan”.
Siguiendo, Alan a indica cu awor IMSAN ta expande su servicio y ta bira un hospital cu 22 cama di ‘short stay’ of ‘dagverblijf’, riba standard di Baptist Health International, cual ta un gran logro no solamente pa Pais Aruba, pero especialmente pa San Nicolas.
E expansion aki no ta solamente positivo pa e parti medico, pero tambe pa e parti economico pa san Nicolas, caminda cu cada proyecto cu ta wordo realisa na San Nicolas ta stimula e economia di un manera of otro.
Pa Howell semper San Nicolas a keda atras y bay atras, pasobra hopi departamento a ‘stroom uit’ di San Nicolas y ta hopi importante pa e departamentonan aki bay bek San Nicolas y pa proyectonan nobo bay San Nicolas.
Mirando e parkeerplaats di IMSAN cu ta yen, ta un indicacion cu por trece bida pa economia na San Nicolas. “Di akinan mi kier a manda un felicitacion grandi pa Dr. Rajnherc cu a traha incansablemente pa cada proyecto realisa bira exitoso. Na IMSAN por ricibi diferente tipo di cuido…operacionnan di wowo ta tuma luga constantemente y lo por haci cualkier operacion den caso di urgencia. Mi kier a manda pabien tambe na e profesionalnan cu ta dunando e servicio y cuido akinan. Mi kier a encurashanan pa nan sigui duna e cuido profesional y amabel. Tambe mi kier a felicita Aruba San Nicolas pa por conta un biaha mas cu un hospital na San Nicolas”, Alan Howell a declara.
Finalisando el a bisa enfaticamente cu partido POR lo sigui bringa pa bienestar di San Nicolas y pariba di brug.