Home » ARUBA TOURISM AUTHORITY TA COMPARTI: DEN LUNA DI MAART ARUBA A RICIBI 48.967 TURISTA KWARTAAL 1 2021 CU GRADO DI RECUPERACION DI 49% VERSUS 2020

ARUBA TOURISM AUTHORITY TA COMPARTI: DEN LUNA DI MAART ARUBA A RICIBI 48.967 TURISTA KWARTAAL 1 2021 CU GRADO DI RECUPERACION DI 49% VERSUS 2020

by Admin
0 comment 41 views

ORANJESTAD – A.T.A. ta desea pa informa nos comunidad di e situacion actual pa loke ta trata e industria turistico, conforme informacion compila na e momentonan aki.

 

 

TURISMO ‘STAY-OVER’

Durante luna di maart 2021 nos isla a yama bonbini na un total di 48.967 bishitante ‘stay-over’. Di e bishitantenan aki, 43.464 tawata procedente di Norte America y 2.538 tawata procedente for di diferente paisnan Europeo. 1.895 bishitante tawata procedente di Latino America y 1.070 bishitante di otro pais/islanan den region.

 

HOTELNAN / AHATA

Segun Aruba Hotel and Tourism Association, na maart 2021, e ‘Average Daily Rate’ (ADR) a baha cu 15.5% compara cu e mesun luna na 2020. Esaki den cifra ta US$ 239.32 na 2020 compara cu US$ 278.23 pa 2021. E entrada pa camber disponibel, e asina yama RevPAR a baha cu 25.9% di US$ 136.71 na 2020 pa US$ 101.35 na 2021. E ocupacion den nos hotelnan a baha cu 12.2% compara cu maart 2020 (e lockdown debi na e pandemia di Covid a inicia dia 17 di maart 2020), e occupancy pa maart 2021 tawata 36.4%. E cifranan di AHATA ta basa riba 19 propiedadnan y 6 timeshare hotels, cual ta mayoria di e hotelnan cu excepcion di Hilton Aruba Caribbean Resort & Casino.

 

TURISMO CRUCERO

E industria di crucero a paralisa desde inicio di e pandemia. Anuncio cu a wordo haci recientemente ta cu Aruba ta den e itinerarionan di parti di Celebrity Cruise Lines cu lo re-inicia servicio entrante juni awo. Sinembargo ainda no tin fecha concreto riba re-inicio di operacion den e region di Caribe.

Ta bon pa recorda cu e industria di crucero ta pendiente pa CDC (Centers for Disease Control and Prevention) aproba e recomendacionnan di e protocolnan relaciona cu COVID-19 pa barconan di crucero. E situacion di e barconan cu por mira staciona den nos waf ta un asina yama ‘warm lay-up’ cual kiermen cu e barco ta riba un standby, wardando riba instruccion na momento cu operacionnan re-inicia. E actividad aki ta produci cierto entrada pa nos economia entre otro unda e barconan ta abastece nan productonan localmente. No tin turista riba e barconan pero solamente e minimo na tripulante (skeleton crew) y nan mester cumpli estrictamente cu tur protocol local y internacional pa loke ta e pandemia actual.

 

KICO POR SPERA PA E RESTO DI 2021?

Basa riba diferente desaroyo actual y tambe analisisnan pa loke ta trata e transporte aereo, ta observa e forecast pa e di dos kwartaal. E proyeccionnan ta mustra un crecemento di entre 15% pa 37% compara cu e prome kwartaal di 2021 durante cual A.T.A. a ricibi un total di 112,317 turista. E proyeccion revisa ta brinda indicacion cu Aruba lo por ta cerando 2021 conforme e scenario ‘cautelosamente optimista’ (recuperacion vs. 2019: 55%) na luga di e scenario ‘conservativo’ (recuperacion vs. 2019: 45%). Ora compara kwartaal 1 di 2021 cu kwartaal 1 di 2020, esaki ta mustra un grado di recuperacion di 49%. Y si compara esaki cu kwartaal 1 di 2019, e grado di locual a recupera den kwartaal 1 di 2021 ta di 38%.

 

TOURISM CREDITS / CENTRAL BANK OF ARUBA

Di acuerdo cu Banco Central e asina yama ‘Tourism Credits’ (cual anteriomente tawata wordo yama ‘Tourism Receipts’) pa e prome 9 luna di aña 2020 a contribui cu AWG 1431.1 miyon den nos economia, cu ta 48.5% menos compara cu e mesun temporada na 2019. Esaki naturalmente ta debi na e pandemia global di Covid-19 unda Aruba tambe a cera su fronteranan temporalmente cual a inicia na luna di maart 2020 te cu juli 2020.

 

Mescos cu otro destinacionnan, nos isla ta pasando den momentonan di reto pa loke ta trata e pandemia aki.

Pa mantene nos mes na e protocolnan estableci door di diferente instancia ta di sumo importancia pa asina baha e cantidad di casonan positivo di Covid-19 den nos comunidad. Corda cu e bienestar di nos cada un ciudadano y nos bishitantenan, ta importante y teniendo nos mes na protocolnan estableci, ta contribui na recuperacion mas lihe di nos economia.

 

Hunto nos lo vence y nos isla y su turismo lo sigui florece.

-FIN-

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio