Home Politics Partido MEP: MARCO BERLIS: CANDIDATO DINAMICO RIBA LISTA VICTORIOSO DI MEP...

Partido MEP: MARCO BERLIS: CANDIDATO DINAMICO RIBA LISTA VICTORIOSO DI MEP “MEP ta carga e balornan cu mi por identifica cu ne”

SHARE

 

 

MEP ta cla pa presenta bo e ekipo dinamico cu lo traha cu un solo meta: ARUBA. Dialuna mainta Partido MEP a lansa e prome candidato nobo cu lo aparece riba e lista dinamico y victorioso pa eleccion 2021. 

Señor Marco Berlis su welonan tabata di Republica Dominicana. Su welo tabata un carpinte reconoci, generoso y amabel na Republica Dominicana. Sinembargo, e mester a huy di su pais, pa motibo di e gobierno dictador di e tempo ey. Su welo a huy den un boto y bay Corsou, unda e la keda poco tempo, pa despues bin residencia na Aruba, un tera di oportunidad. Na Aruba mi welonan a haña nan yiunan, incluyendo e tata di Marco, sr. Braulio Berlis, miho conoci como Chicho Berlis. Mama di Marco, a nace na Indonesia, na e isla di Malang. Su welo di parti mi mama tabata un marinier Hulandes y su wela tabata un ama di cas indones. 

Na 1974, mayornan di Marco a disidi di bin establece nan mes na Aruba, den e bario di Catiri unda cu el a biba casi henter su bida. Asina dos persona, di dos continente, completamente diferente den tradicion y cultura a encontra otro, casa cu otro y lanta un famia den e miho luga den Caribe y e mundo, nos Pais Aruba! 

Den su discurso di introduccion, Marco a conta den corto di su bida y su famia y a enfatisa e motibo pa cua el a dicidi pa subi riba e lista di Partido MEP.

“Mi ta agradecido di e herencia di mi diversidad, un parti Latino, marca cu sanger Dominicano y un parti Asiatico y Hulandes. Mi ta agradecido cu mi por a wordo lanta y educa den un pais, cu aunke e ta chikito den tamaño, a sa di lidera e otro islanan y asta cierto nacionnan den Caribe cu su innovacion, creatividad, resilencia y compromiso cu nos Turismo. 

Si, mi ta orguyoso di por wordo yama un Arubiano, cu a studia y termina su estudio akinan na Maria College Mavo, Colegio Arubano Havo y mi Associate Degree den Practical Ministries cu mi a finalisa na Merca & Zuid Africa. 

Mi tata semper a motiva nos bida for di trempan pa lanta den e disiplina di deporte. Mi mayornan a hinca ami y mi ruman menor Emilio, for di un edad hoben den landamento y baseball. Pa hopi aña mi a hunga futbol tambe semper pa mi bario di Tankileendert, cual nos a logra di promove te den division di honor. Nunca mi no a hunga pa un otro ekipo. 

Na 2003 mi a casa cu mi esposa Roselyn Petrocchi. Nos tin 19 aña casa y tin dos yiu muhe, Naftali y Elisha. Un di nos vocacion y passionnan semper tabata esun spiritual y social. Na esaki nos ta dedicando nos mes pa casi 16 aña caba di nos bida, trahando duru cu vision y cu personanan den nos comunidad. Semper nos a yuda den e area di duna conseho, entrenamiento, coaching, restauracion, area spiritual, familiar, y formacion. E ta for di e pasion aki cu mi a cuminsa cultiva y sinti un yamado fuerte, cu tabata inspira mi y atrae mi pa drenta den politica. 

Cuanto biaha den pasado, Aruba no a confronta cu retonan grandi? Sinembargo nos a demostra como Arubiano cu nos ta un pueblo resiliente, un pueblo determina, un pueblo trahado, un pueblo dedica, un pueblo fuerte, modelo cu lo lidera den Caribe como ehempel. 

E pueblo latino ta un pueblo digno, cu ta parti importante di nos Sociedad. Hopi ta hendenan studia, cu ta bin y contribui honestamente y integra na nos pais. P’esey como pais nos mester sa di responde na e necesidadnan y transformacion di nos poblacion. Nos tin hopi latino exitoso aki na Aruba, un pais di oportunidad. 

DICON MEP? 

MEP ta carga e balornan cu mi por identifica cu ne. MEP tin un lider, un Minister President Evelyn Wever-Croes cu a sa di demostra di tin un curason, curashi y determinacion increible. Su liderazgo y forsa ta un inspiracion pa nos tur. E ta un persona incansabel, cu a sa di para cu curashi y determinacion dilanti e peor crisis cu nos a yega di conoce.
Min press ta lidera cu forsa, gracia y exelencia. Mi ta gradici Minister President Evelyn Wever Croes y henter e Partido MEP pa e oportunidad fenomenal aki. 

Danki Aruba pa conecta cu nos, bo voto lo haci cu nos voz lo resona un biaha mas pa un miho Aruba!”. 

 

 

LINK DI VIDEO DI INTRODUCCION DI MARCO BERLIS:

https://www.dropbox.com/s/n2tr7d6xy815u8r/MARCOS%20BERLIS.mov?dl=0